കെയ്റോ: ഈജിപ്ത് സന്ദർശനത്തിനെത്തിയ പ്രധാനമന്ത്രി നരേന്ദ്രമോദിയ്ക്ക് ഊഷ്മളമായ വരവേൽപ്പ്. ഇന്ന് റിറ്റ്സ് കാൾട്ടൻ എന്ന ഹോട്ടലിൽ തങ്ങുന്ന പ്രധാനമന്ത്രിയ്ക്ക് രാജ്യത്തെ പ്രവാസികൾ ഉജ്ജ്വലമായ സ്വീകരണമാണ് ഒരുക്കിയിരുന്നത്. വന്ദേമാതരം ആലപിച്ചും ത്രിവർണ പതാക വീശിയും പ്രധാനമന്ത്രിയുടെ വരവിൽ അവർ സന്തോഷം പ്രകടിപ്പിച്ചു. ജനങ്ങൾ ഗാനങ്ങൾ ആലപിക്കുകയും മറ്റ് സാംസ്കാരിക പരിപാടികൾ അവതരിപ്പിക്കുകയും ചെയ്തു.
തന്നെ സ്വീകരിക്കാനായി തടിച്ചു കൂടിയ ജനങ്ങളെ അദ്ദേഹം അഭിവാദ്യം ചെയ്യുകയും അവരുമായി സംവദിക്കുകയും ചെയ്തു. പ്രസിഡന്റ് അബ്ദുൽ ഫത്താഹ് എൽ-സിസിയുടെ ക്ഷണപ്രകാരമാണ് പ്രധാനമന്ത്രിയുടെ ഈജിപഷ്യൻ സന്ദർശനം. 2023 ജനുവരിയിൽ ഇന്ത്യയുടെ റിപ്പബ്ലിക് ദിനാഘോഷങ്ങളിൽ ‘മുഖ്യാതിഥി’ ആയിരുന്നു ഈജിപഷ്യൻ പ്രസിഡന്റ്.
ഈജിപ്ഷ്യൻ സന്ദർശനത്തിന്റെ ഭാഗമായി അദ്ദേഹം ഇന്ത്യൻ പ്രവാസികളുമായും നേതാക്കളുമായും കൂടിക്കാഴ്ച നടത്തും. പ്രധാനമന്ത്രി മൊസ്തഫ മദ്ബൗലിയുമായി വട്ടമേശ സമ്മേളനത്തിലും പങ്കെടുക്കും. ഒപ്പം പ്രസിഡന്റ് അബ്ദുൽ ഫത്താഹ് എൽ-സിസിയുമായി അദ്ദേഹം കൂടിക്കാഴ്ച നടത്തും. ഇരുരാജ്യങ്ങളിലേയും പ്രധാനമന്ത്രിമാർ തമ്മിൽ നടത്തുന്ന ആദ്യ വട്ടമേശ സമ്മേളനമാണ് ഇത്. കൂടാതെ ചരിത്ര പ്രസിദ്ധമായ അൽ-ഹക്കിം മസ്ജിദ് പ്രധാനമന്ത്രി സന്ദർശനം നടത്തും. ഒന്നാം ലോകമഹായുദ്ധകാലത്ത് ഈജിപ്തിനുവേണ്ടി പോരാടിയ ഇന്ത്യൻ സൈനികർക്ക് ആദരാഞ്ജലികൾ അർപ്പിക്കാൻ അദ്ദേഹം ഹീലിയോപോളിസ് വാർ ഗ്രേവ് സെമിത്തേരിയും സന്ദർശിക്കും.
