സമൂഹമാദ്ധ്യമങ്ങളിൽ തരംഗമായി കിംഗ് ഓഫ് കൊത്ത ടീസർ. റിലീസ് ചെയ്ത് 12 മണിക്കൂറിനുള്ളിൽ ഒൻപത് ദശലക്ഷം പേരാണ് ടീസർ കണ്ടത്. ഇതോടെ മലയാളത്തിൽ ഒരു ദിവസത്തിനുള്ളിൽ യൂട്യൂബിൽ ഏറ്റവും കൂടുതൽ പേർ കണ്ട ടീസറായി മാറി ഇരിക്കുകയാണ് ദുൽഖർ സൽമാൻ നായകനായെത്തുന്ന കിംഗ് ഓഫ് കൊത്ത. യൂട്യൂബിൽ ഇപ്പോഴും ട്രെൻഡിംഗിൽ ഒന്നാമതാണ് ടീസർ.
ആക്ഷൻ രംഗങ്ങളും പഞ്ച് ഡയലോഗുകളും കൊണ്ട് നിറഞ്ഞതാണ് ടീസർ. സിനിമയുടെ ഫസ്റ്റ്ലുക്ക് മുതൽ പ്രേക്ഷകരിൽ നിറഞ്ഞുനിന്ന ആകാക്ഷ ഇതോടെ ഇരട്ടിയായി. എന്താണ് കൊത്തയെന്നും അവിടെത്തെ ജീവിതമെന്നും വരച്ചുകാട്ടുന്നതാണ് ടീസർ. കഥയിലൂടെയാണ് ടീസർ ആരംഭിക്കുന്നത്. രക്ഷകനായി കാത്തിരിക്കുന്ന ജനതയ്ക്ക് അവരുടെ രക്ഷകനെ തിരിച്ചുകിട്ടിയ കഥ. ‘ഇത് കൊത്തയാണ്, ഇവിടെ ഞാൻ പറയുമ്പോൾ പകൽ.. ഞാൻ പറയുമ്പോൾ രാത്രി’ എന്നീ ഡയലോഗുകളും ആക്ഷൻ രംഗങ്ങളുമാണ് സമൂഹമാദ്ധ്യമങ്ങളിൽ നിറയുന്നത്.
ദുൽഖർ സൽമാൻ നായകനായി അഭിനയിക്കുന്ന ചിത്രം നവാഗതനായ അഭിലാഷ് ജോഷിയാണ് സംവിധാനം. ഷബീർ കല്ലറക്കൽ, പ്രസന്ന, ഐശ്വര്യ ലക്ഷ്മി, നൈല ഉഷ, ചെമ്പൻ വിനോദ്, ഗോകുൽ സുരേഷ്, ഷമ്മി തിലകൻ, ശരൺ, അനിഖ സുരേന്ദ്രൻ എന്നിവർ പ്രധാനകഥാപാത്രങ്ങളെ അവതരിപ്പിക്കുന്നു. ചിത്രം ഓണത്തിന് റിലീസ് ചെയ്യും. തിരക്കഥ അഭിലാഷ് എൻ ചന്ദ്രൻ. ഛായാഗ്രഹണം നിമിഷ് രവി, സീ സ്റ്റുഡിയോസും വെഫേറെർ ഫിലിംസും ചേർന്നാണ് നിർമ്മാണം.
