മലയാളത്തിലെ എക്കാലത്തെയും ക്ലാസിക് ചിത്രങ്ങലിൽ ഒന്നാണ് മണിച്ചിത്രത്താഴ്. ചിത്രത്തിന് പിൽക്കാലത്ത് ചിതത്തിന് പല ഭാഷകളിലും റീമേക്കുകൾ വന്നിരുന്നു. ഇതിൽ ചിത്രത്തിന്റെ തമിഴ് പതിപ്പ് മലയാളികളും ഒരുപോലെ ഏറ്റെടുത്തിരുന്നു. വർഷങ്ങൾക്ക് ശേഷം ചിത്രത്തിന്റെ രണ്ടാം പതിപ്പ് അണിയറയിൽ ഒരുങ്ങുന്ന വാർത്തകളും വളരെ അധികം ചർച്ച ചെയ്യപ്പെട്ടിരുന്നു. ഇപ്പോഴിതാ ചന്ദ്രമുഖി 2-ന്റെ റിലീസ് തീയതി പുറത്ത് വിട്ടിരിക്കുകയാണ് അണിയറ പ്രവർത്തകർ.
2023 സെപ്റ്റംബർ 19 ഗണേശ ചതുർഥി ദിവസത്തിലാകും ചിത്രം റിലീസ് ചെയ്യുക. ചിത്രത്തിന്റെ ആദ്യഭാഗം ഒരുക്കിയ വി വാസുതന്നെയാണ് രണ്ടാം ഭാഗവും ഒരുക്കുന്നത്. ബോളിവുഡ് താരസുന്ദരി കങ്കണ റണാവത്തും നടനും കോറിയോഗ്രാഫറുമായ രാഘവ ലോറൻസും ചിത്രത്തിൽ ഒരുമിക്കുന്നു എന്ന പ്രത്യേകതയും ചിത്രത്തിനുണ്ട്. തമിഴിന് പുറമെ മലയാളം, തെലുങ്ക്, ഹിന്ദി, കന്നട ഭാഷകളിലും ചിത്രം റിലീസ് ചെയ്യും.
അടുത്തിടെ ചിത്രത്തിന്റെ പാക്കപ്പ് ഫോട്ടോകൾ അണിയറക്കാർ പുറത്തുവിട്ടിരുന്നു. ചിത്രത്തിൽ ഏറെ നാളുകൾക്ക് ശേഷം വടിവേലു ഒരു പ്രധാനവേഷത്തിൽ എന്നപ്രത്യേകത കൂടിയുണ്ട്. രാധിക ശരത്കുമാർ, ലക്ഷ്മി മേനോൻ, മഹിമ നമ്പ്യാർ, സൃഷ്ടി ദാംഗെ എന്നിവരും ചിത്രത്തിലെ മറ്റ് കഥാപാത്രങ്ങളെ അവതരിപ്പിക്കും. ലൈക്ക പ്രൊഡക്ഷൻസിന്റെ ബാനറിൽ സുബ്ബാസ്‌കരനാണ് ചന്ദ്രമുഖി 2 നിർമ്മിക്കുന്നത്. ഓസ്‌കാർ അവാർഡ് ജേതാവ് എംഎം കീരവാണിയാണ് ചിത്രത്തിന്റെ സംഗീത സംവിധാനം.
