ഇന്ത്യൻ സൂപ്പർ ലീഗിൽ ഏറ്റവും ആരാധകരുളള കേരള ബ്ലാസ്റ്റേഴ്സ് എഫ്സി 2023-2024 പ്രീ സീസൺ ട്രാൻസ്ഫർ മാർക്കറ്റിൽ നിന്ന് മികച്ച താരങ്ങളെ സ്വന്തമാകാനൊരുങ്ങുന്നതായി റിപ്പോർട്ടുകൾ.
ഇന്ത്യൻ ഫുട്ബോളിലെ മുൻനിര താരങ്ങളെ സ്വന്തമാക്കാനാണ് ബ്ലാസ്റ്റേഴ്സ് നോട്ടമിടുന്നതെന്നാണ് പുറത്തുവരുന്ന വിവരങ്ങൾ. ഈ മൂന്ന് മുൻനിര താരങ്ങളെ ടീമിലെടുക്കുന്നതിൽ ഔദ്യോഗിക സ്ഥിരീകരണം ഇതുവരെ ലഭിച്ചിട്ടില്ല. ലിസ്റ്റൺ കൊളാസോ,പ്രിതം കോട്ടാൽ ഐബാൻബ ഡോഹ്ലിംഗ് എന്നിവരാണ് ബ്ലാസ്റ്റേഴ്സ് ലക്ഷ്യം വച്ചിരിക്കുന്നത്. 2023-2024 സീസണിലേക്കായി ഈ മൂന്ന് ട്രാൻസ്ഫറും കേരള ബ്ലാസ്റ്റേഴ്സ് എഫ് സി നടത്തിയാൽ ഇന്ത്യൻ ഫുട്ബോളിൽ വലിയ തരംഗം സൃഷ്ടിക്കും.
മോഹൻ ബഗാൻ സൂപ്പർ ജയന്റ്സിന്റെ ലിസ്റ്റൺ കൊളാസോയെയാണ് 2023 -2024 സീസണ് മുന്നോടിയായി കേരള ബ്ലാസ്റ്റേഴ്സ് എഫ്സി ലക്ഷ്യംവച്ചവരിൽ പ്രധാനി. ഹൈദരാബാദ് എഫ്.സിയിൽ നിന്നാണ് ലിസ്റ്റൺ കൊൽക്കത്തയിലെത്തിയത്. 2022-2023 ഇന്ത്യൻ സൂപ്പർ ലീഗ് സീസണിൽ സ്ഥിരമായി സ്റ്റാർട്ടിംഗ് ഇലവനിൽ ഇടം പിടിക്കാൻ ലിസ്റ്റൺ കൊളാസോയ്ക്ക് സാധിച്ചില്ല. ഐഎസ്എല്ലിൽ ഒരു ഗോളും നാല് അസിസ്റ്റും മാത്രമായിരുന്നു കഴിഞ്ഞ സീസണിലെ ലിസ്റ്റൺ കൊളാസോയുടെ പ്രകടനം. ടീമിൽ മത്സര സമയം കൂടുതൽ ലഭിക്കാൻ ലിസ്റ്റൺ കൊളാസോ കേരള ബ്ലാസ്റ്റേഴ്സ് എഫ്സിയിലേക്ക് എത്താൻ സാധ്യതയുണ്ട്. ഗോവ സ്വദേശിയായ ലിസ്റ്റൺ ക്ലബ് തലത്തിൽ 112 മത്സരങ്ങളിൽ 29 ഗോളും 15 അസിസ്റ്റും നടത്തിയിട്ടുണ്ട്.
യുവതാരം ഹോർമിപാമിനെ നൽകി പ്രിതം കോട്ടാലിനെ ലക്ഷ്യം വച്ച് കേരള ബ്ലാസ്റ്റേഴ്സ് എഫ് സി രംഗത്ത് ഉണ്ടെന്ന വാർത്ത നേരത്തേ സ്പോർട്സ് ഏജൻസികൾ പുറത്തുവിട്ടിരുന്നു. എന്നാൽ, 2025 വരെ മോഹൻ ബഗാൻ സൂപ്പർ ജയ്ന്റ്സുമായി പ്രിതം കോട്ടൽ കരാർ കാലാവധി ദീർഘിപ്പിച്ചു. ഈ കരാർ പുതുക്കലിനു ശേഷവും പ്രിതം കോട്ടലിനായി കേരള ബ്ലാസ്റ്റേഴ്സ് എഫ് സി രംഗത്തുണ്ടെന്നതാണ് ഏറ്റവും ശ്രദ്ധേയം. ഇന്ത്യക്കായി 50 മത്സരങ്ങളിൽ ഇറങ്ങിയ പ്രീതം കോട്ടൽ, ക്ലബ് തലത്തിൽ 260 മത്സരങ്ങളിൽ ഇറങ്ങിയിട്ടുണ്ട്. 29 കാരനായ റൈറ്റ് ബാക്ക് – സെന്റർ ബാക്ക് താരം ഒമ്പത് ഗോൾ നേടുകയും എട്ട് ഗോളിന് അസിസ്റ്റ് നടത്തുകയും ചെയ്തു. 27 കാരനായ മേഘാലയൻ സെന്റർ ബാക്ക് ഐബാൻബ ഡോഹ്ലിംഗ് പ്രതിരോധനിരയിൽ ഏതു പൊസിഷനിലും കളിക്കാൻ കഴിവുളള താരമാണ്.2022-2023 സീസണിൽ എഫ്സി ഗോവയ്ക്കു വേണ്ടി 21 മത്സരങ്ങളിൽ ബൂട്ടണിഞ്ഞ ഐബാൻബ ഡോഹ്ലിംഗ് ഒരു ഗോൾ നേടിയിരുന്നു .
Comments