തിരുവനന്തപുരം: പ്രായോഗിക വിഷയങ്ങൾ മനസിലാക്കി പോലീസ് സംവിധാനം എങ്ങനെ മെച്ചപ്പെടുത്തണമെന്നത് ചർച്ച ചെയ്യണമെന്ന് മുൻ ഡിജിപി എ. ഹേമചന്ദ്രൻ. തിരുവനന്തപുരം ചന്ദ്രശേഖരൻ നായർ സ്റ്റേഡിയത്തിൽ നടന്ന ‘നീതി എവിടെ’ എന്ന തന്റെ പുസ്തകത്തിന്റെ സംവാദ വേദിയിൽ സംസാരിക്കുകയായിരുന്നു എ. ഹേമചന്ദ്രൻ. സോളാർ കമ്മീഷനെതിരെ രൂക്ഷ വിമർശനം ഉള്ള പുസ്തകം ഡി.സി. ബുക്സാണ് പുറത്തിറക്കിയിരിക്കുന്നത്.
ജസ്റ്റിസ് ശിവരാജൻ കമ്മീഷനെതിരെ രൂക്ഷ വിമർശനം ഉൾക്കൊള്ളുന്ന എ ഹേമചന്ദ്രൻ ഐപിഎസിന്റെ നീതി എവിടെ എന്ന പുസ്തകം വലിയ വിവാദമായിരുന്നു. പുസ്തകത്തിനെ കുറിച്ചുള്ള ചർച്ചകളും സംവാദവും പുരോഗമിക്കുകയാണ്. സോളാർ കമ്മീഷൻ മസാലക്കഥകൾ മാത്രമാണ് അന്വേഷിച്ചതെന്ന ഹേമചന്ദ്രന്റെ പരാമർശമാണ് വിവാദമായത്. വായനക്കാർ വിമർശനാത്മകമായി തന്നെ പുസ്തകത്തെ സമീപിക്കട്ടെയെന്നാണ് എ. ഹേമചന്ദ്രന്റെ നിലപാട്.
ഡി.സി. ബുക്സാണ് പുസ്തകത്തിന്റെ പ്രസാദകർ. ഡി.സി. പുസ്തകമേളയോടനുബന്ധിച്ച് ചന്ദ്രശേഖരൻ നായർ സ്റ്റേഡിയത്തിൽ നടന്ന പുസ്തക സംവാദത്തിൽ മാദ്ധ്യമപ്രവർത്തകൻ എം.ജി രാധാകൃഷ്ണൻ, എഴുത്തുകാരനും സാഹിത്യ നിരൂപകനുമായ പി.കെ.രാജശേഖരൻ തുടങ്ങിയവർ പങ്കെടുത്തു.
