ബാഹുബലി എന്ന ബ്രഹ്മാണ്ഡ ചിത്രത്തിലൂടെ ഇന്ത്യ ഒട്ടാകെ ആരാധകരെ സ്വന്തമാക്കിയ താരമാണ് പ്രഭാസ്. ശേഷം കഥാപാത്രങ്ങൾ തിരഞ്ഞെടുത്ത് ചെയ്യാൻ തുടങ്ങിയ താരത്തിന്റെ അവസാനമായി പുറത്തുവന്ന ചിത്രങ്ങളെല്ലാം വൻ പരാജയങ്ങളായിരുന്നു. എന്നാൽ വരാനിരിക്കുന്ന പ്രഭാസ് ചിത്രങ്ങളിൽ വലിയ പ്രതീക്ഷയാണ് ഉള്ളത്. ഇക്കൂട്ടത്തിൽ മലയാളികൾ ഒരുപോലെ കാത്തിരിക്കുന്ന ചിത്രമാണ് ‘സലാർ’.
വിജയ ചിത്രമായ കെജിഎഫിന് ശേഷം സംവിധായകൻ പ്രശാന്ത് നീലാണ് സലാർ അണിയിച്ചൊരുക്കുന്നത്. ചിത്രത്തിന്റെ പുതിയ അപ്ഡേറ്റുകളാണ് ഇപ്പോൾ ചർച്ചയാകുന്നത്. സലാറിന്റെ ടീസർ നാളെ റിലീസ് ചെയ്യുമെന്നാണ് അണിയറ പ്രവർത്തകർ അറിയിച്ചിരിക്കുന്നത്. നാളെ രാവിലെ 5.12-ന് ടീസർ റിലീസ് ചെയ്യും. ആക്ഷൻ ത്രില്ലർ വിഭാഗത്തിൽപ്പെട്ട ചിത്രത്തിൽ പൃഥ്വിരാജും പ്രധാന വേഷത്തിൽ എത്തുന്നുണ്ട്.
പൃഥ്വിരാജും ടീസർ അപ്ഡേറ്റ് ആരാധകരുമായി പങ്കുവച്ചിട്ടുണ്ട്. ഇതിന് താഴെ ചിത്രത്തിൽ പൃഥ്വിരാജ് വില്ലനായാണോ നായകനായാണോ എത്തുന്നതെന്നാണ് പലരും കമന്റായി രേഖപ്പെടുത്തിയിരിക്കുന്നത്. ചിത്രത്തിൽ പൃഥ്വിരാജ് ഉള്ളതായി വാർത്ത വന്നപ്പോൾ മുതൽ നടൻ കൈകാര്യം ചെയ്യുന്നത് പ്രതിനായക വേഷം ആയിരിക്കുമെന്നായിരുന്നു റിപ്പോർട്ടുകൾ.
