ലക്‌നൗ: രാഷ്ട്രപതി ദ്രൗപദി മുർമുവുമായി കൂടിക്കാഴ്ച നടത്തി കേന്ദ്ര ഗതാഗതമന്ത്രി നിതിൻ ഗഡ്കരി. മഹാരാഷ്‌ട്രയിലെ നാഗ്പൂർ രാജ്ഭവനിൽ വെച്ചാണ് കൂടിക്കാഴ്ച നടന്നത്. മഹാരാഷ്‌ട്ര ഗവർണർ രമേഷ് ബെയ്സ്, ഉപമുഖ്യമന്ത്രി ദേവേന്ദ്ര ഫഡ്നാവിസ് എന്നിവരും ചർച്ചയിൽ പങ്കെടുത്തു. നാഗ്പൂരിൽ സംഘടിപ്പിച്ച ഭാരതീയ വിദ്യാഭവന്റെ സാംസ്‌കാരിക കേന്ദ്രം രാഷ്ട്രപതി ഇന്ന് ഉദ്ഘാടനം ചെയ്തിരുന്നു.
ഭാരതീയ വിദ്യാഭവന്റെ ആരംഭം മുതൽ തന്നെ സാംസ്‌കാരികവും വിദ്യാഭ്യാസപരവുമായ മികവിന്റെ കേന്ദ്രമെന്ന നിലയിൽ വിദ്യാഭവൻ മികവ് തെളിയിച്ചിട്ടുണ്ട്. ഇതിനോടനുബന്ധിച്ച് 350 ലധികം സ്ഥാപനങ്ങളാണ് ആധുനിക വിദ്യാഭ്യാസം നൽകുന്നത്. ഇന്ത്യൻ മൂല്യങ്ങളും പാരമ്പര്യങ്ങളും സംരക്ഷിക്കുന്നതിലും പ്രോത്സാഹിപ്പിക്കുന്നതിലും ഇവർ സുപ്രധാന പങ്ക് വഹിക്കുന്നു. മഹാരാഷ്‌ട്രയും നാഗ്പൂരും ആത്മീയ സാംസ്‌കാരിക പാരമ്പര്യങ്ങളുടെ പ്രധാന കേന്ദ്രങ്ങളായിരുന്നവെന്നും ഉദ്ഘാടന ചടങ്ങിൽ സംസാരിക്കവെ രാഷ്ട്രപതി വ്യക്തമാക്കി.
