മെറ്റ പുതിയ മൈക്രോബ്ലോഗിങ് പ്ലാറ്റ്ഫോം ‘ത്രെഡ്സ്’ അവതരിപ്പിച്ചതിന് പിന്നാലെ സോഷ്യൽ മിഡീയയിലെ പോര് മുറുകുന്നു. ത്രെഡ്സിനോപ്പം ചർച്ചയായിരിക്കുകയാണ് ത്രെഡ്സിന്റെ ലോഗോയും. ലോഗയ്ക്ക് മലയാളം, തമിഴ് ലിപികളുമായി സാമ്യതയുണ്ടെന്നാണ് സമൂഹമാദ്ധ്യമ നിരീക്ഷകരുടെ കണ്ടെത്തൽ. ലോഗോയ്ക്ക് മലയാളം യുണീകോഡ് ലിപിയിലെ ‘ത്ര’യും ‘ക്ര’യുമായി ബന്ധമുണ്ടെന്നാണ് മലയാളികളുടെ കണ്ടെത്തൽ. തമിഴിലെ ‘കു’ പോലെയുണ്ടെന്നാണ് തമിഴരുടെ വാദം.
അവതരിപ്പിച്ച് ണിക്കൂറുകള്ക്കകം ഏകദേശം അമ്പത് ലക്ഷത്തിലധികം ആളുകളാണ് ത്രെഡ്സിൽ അക്കൗണ്ട് തുറന്നത്. ട്വിറ്ററിന് പകരക്കാരനായാണ് ത്രെഡ്സിനെ മാർക്ക് സക്കർബർഗ് അവതരിപ്പിച്ചിരിക്കുന്നത്. ട്വിറ്ററിനേയും ട്വിറ്ററിന് പകരക്കാർ എന്ന നിലയിൽ രംഗപ്രവേശം ചെയ്ത ബ്ലൂ സ്കൈ, മാസ്റ്റഡൺ പോലുള്ള പ്ലാറ്റ്ഫോമുകളെയും
വെല്ലുവിളിച്ചുകൊണ്ടാണ് ത്രെഡ്സിന്റെ കടന്നു വരവ്.
ഇൻസ്റ്റഗ്രാമുമായി കണക്ട് ചെയ്ത് പ്രവർത്തിക്കുന്ന ത്രെഡ്സ് എഴുത്തിലൂടെ ആശയവിനിമയം നടത്തുന്ന ആപ്പാണ്. ആപ്പിൾ, ആൻഡ്രോയ്ഡ് പ്ലേസ്റ്റോറുകളിൽ നിന്ന് ആപ്പ് സൗജന്യമായി ഡൗൺലോഡ് ചെയ്യാം. അതിന് ശേഷം ഇൻസ്റ്റഗ്രാം ഐഡി ഉപയോഗിച്ച് ലോഗിൻ ചെയ്യാം. ഇൻസ്റ്റഗ്രാം ഇല്ലാത്തവർക്ക് ത്രെഡ്സിൽ ലോഗിൻ ചെയ്യണമെങ്കിൽ പുതിയ ഇൻസ്റ്റഗ്രാം അക്കൗണ്ട് ആരംഭിക്കേണ്ടതുണ്ട്. ഇൻസ്റ്റഗ്രാമിൽ അക്കൗണ്ട് ഉണ്ടെങ്കിൽ ലോഗിൻ ചെയ്യുമ്പോൾ ആപ് അനുമതി തേടുക മാത്രമാണ് ചെയ്യുക. അതായത് വീണ്ടും ലോഗിൻ വിശദാംശങ്ങൾ ചേർക്കേണ്ടതില്ല.
