ബ്ലോഗിംഗ് സൈറ്റായ ട്വിറ്ററിന് നിലവിൽ ആകെയുള്ളത് 45 കോടി ഉപയോക്താക്കളാണ്. എന്നാൽ ലോഞ്ച് ചെയ്ത് 48 മണിക്കൂറുകൾക്കുള്ളിൽ ട്വിറ്ററിന്റെ എതിരാളിയായ ത്രെഡ്‌സ് 60 ലക്ഷം സജീവ ഉപയോക്താക്കളെയാണ് സ്വന്തമാക്കിയിരിക്കുന്നത്. സമൂഹമാദ്ധ്യമങ്ങളുടെ ചരിത്രത്തിൽ തന്നെ ഏറ്റവും വേഗത്തിൽ ഇത്രയധികം ഉപയോക്താക്കളെ സ്വന്തമാക്കിയ പ്ലാറ്റ്‌ഫോം കൂടിയാണ് മെറ്റയുടെ ഉടമസ്ഥതയിലുള്ള ത്രെഡ്‌സ്.
എന്നാൽ വ്യാഴാഴ്ച ആപ്പ് നിലവിൽ വന്ന് ദിവസങ്ങൾ പിന്നിടുന്നതിന് മുൻപ് തന്നെ ത്രെഡ്‌സിൽ തരംഗമായി മാറിയിരിക്കയാണ് മിസ്റ്റർ ബീസ്റ്റ്. മിസ്റ്റർ ബീസ്റ്റ് എന്നറിയപ്പെടുന്ന യൂട്യൂബറായ ജെയിംസ് സ്റ്റീഫൻ ഡൊണാൾഡ്‌സണാണ് ത്രെഡ്‌സിൽ ഒരു ദശലക്ഷം ഫോളോവേഴ്‌സിനെ സ്വന്തമാക്കിയിരിക്കുന്നത്. ഇതോടെ ത്രെഡ്‌സിൽ ഇത്രയധികം ഫോളോവേഴ്‌സിനെ ത്രെഡ്‌സിൽ സ്വന്തമാക്കിയെന്ന ഗിന്നസ് റെക്കോർഡും മിസ്റ്റർ ബീസ്റ്റിന് സ്വന്തമായി. ഗിന്നസ് വേൾഡ് റെക്കോർഡാണ് ഇക്കാര്യം ഔദ്യോഗികമായി അറിയിച്ചത്.
ഗിന്നസ് റെക്കോർഡിൽ പറയുന്നത് പ്രകാരം വെറും മൂന്ന് തവണ മാത്രമാണ് യൂട്യൂബർ ത്രെഡ്‌സിൽ പോസ്റ്റ് ചെയ്തത്. ഇതോടെ അദ്ദേഹത്തിന് ഒരു ദശലക്ഷം ഫോളോവേഴ്‌സിനെ ലഭിക്കുകയായിരുന്നു. അതേസമയം സാങ്കേതികമായി നോക്കുമ്പോൾ പത്ത് ലക്ഷം ഫോളോവേഴ്‌സിനെ ആദ്യമായി നേടുന്ന അക്കൗണ്ട് മിസ്റ്റർ ബീസ്റ്റിന്റേതല്ല. ഇൻസ്റ്റഗ്രാം, നാഷണൽ ജിയോഗ്രാഫിക് എന്നീ അക്കൗണ്ടുകൾ ഇതിന് മുൻപ് തന്നെ ഒരു ദശലക്ഷം പിന്നിട്ടിരുന്നു. എന്നാൽ ത്രെഡ്‌സിൽ ഒരു മില്യൺ തികയ്‌ക്കുന്നത് ഇദ്ദേഹമാണെന്ന് ഗിന്നസ് അറിയിച്ചു.
ലോകത്ത് ഏറ്റവും അധികം സബ്‌സ്‌ക്രൈബേഴ്‌സ് കൂടിയുള്ള വ്യക്തിയാണ് മിസ്റ്റർ ബീസ്റ്റ്. 165 ദശലക്ഷം ആളുകളാണ് ബീസ്റ്റിന്റെ യൂട്യൂബ് ചാനൽ സബ്‌സ്‌ക്രൈബ് ചെയ്തിട്ടുള്ളത്. 2022-ൽ ലോകത്തെ തന്നെ ഏറ്റവും ചിലവേറിയ യൂട്യൂബ് വീഡിയോ പുറത്തിറക്കി മിസ്റ്റർ ബീസ്റ്റ് ചരിത്രം സൃഷ്ടിച്ചിരുന്നു.
