ഏറെ സുരക്ഷിതമായ പേയ്മെന്റ് രീതിയാണ് യൂണിഫേഡ് പേയ്മെന്റ് ഇൻർഫേസ് എന്നറിയപ്പെടുന്ന യുപിഐ. എന്നിരുന്നാലും ചിലപ്പോൾ പിശകുകൾ കാരണം പണം നഷ്ടപ്പെടാൻ സാദ്ധ്യതയുണ്ട്. പലപ്പോഴും തെറ്റായ യുപിഐ ഐഡി നൽകി പണം മറ്റൊരാളുടെ ബാങ്ക് അക്കൗണ്ടിലേക്ക് അബദ്ധത്തിൽ അയക്കാറുണ്ട്. ഈ സാഹചര്യങ്ങളിൽ പണം നഷ്ടമായെന്ന് കരുതി സങ്കടപ്പെടാറാണ് പതിവ്. എന്നാൽ ഇതിന് പരിഹാരമുണ്ടെന്ന് കാര്യം എത്രപേർക്കറിയാം?
റിസർവ് ബാങ്ക് ഓഫ് ഇന്ത്യ ഇതിനായി ചില മാർഗനിർദ്ദേശങ്ങൾ പുറപ്പെടുവിച്ചിട്ടുണ്ട്. ഇത്തരത്തിൽ പണം നഷ്ടമായാൽ ആദ്യം പേയ്മെന്റ് സംവിധാനത്തിലാണ് പരാതി സമർപ്പിക്കേണ്ടത്. പേടിഎം, ഗൂഗിൾ പേ, ഫോൺ പേ തുടങ്ങിയ സ്ഥാപനങ്ങളുടെ കസ്റ്റമർ സപ്പോർട്ട് ഓഫീസുകൾ വഴി റീഫണ്ടിന് അഭ്യർത്ഥിക്കാവുന്നതാണ്. ഇടപാട് വിശദാംശങ്ങൾ പങ്കുവെച്ച് ബാങ്കിലും പരാതി നൽകേണ്ടതുണ്ട്. പണം തെറ്റായി നൽകിയാൽ പരാതി ലഭിച്ച് 48 മണിക്കൂറിനുള്ളിൽ പണം തിരികെ നൽകണമെന്നാണ് ആർബിഐ മാർഗനിർദ്ദേശങ്ങളിൽ വ്യക്തമാക്കുന്നത്. ഇടപാട് നടന്ന് മൂന്ന് ദിവസത്തിനുള്ളിൽ പരാതി നൽകാൻ ഉപയോക്താവിന് കഴിയണം.
18001201740 എന്ന നമ്പറിൽ വിളിച്ച് പരാതി നൽകാവുന്നതാണ്. ഇതിന് ശേഷം ബന്ധപ്പെട്ട ബാങ്കിൽ പോയി എല്ലാ വിവരങ്ങളും അടങ്ങിയ ഒരു ഫോം പൂരിപ്പിച്ച് നൽകണം. ബാങ്ക് സഹായിക്കാൻ വിസമ്മതിച്ചാൽ ഉപഭോക്തൃ പരാതികൾ പരിഹരിക്കുന്നതിന് ഓംബുഡ്സ്മാൻ എന്നറിയപ്പെടുന്ന മുതിർന്ന വ്യക്തിയ്ക്ക് പരാതി സമർപ്പിക്കാവുന്നതാണ്. ആർബിഐ നിയോഗിച്ചിരിക്കുന്ന മുതിർന്ന ഉദ്യോഗസ്ഥനാണ് ഓംബുഡ്സ്മാൻ. യുപിഐ, ക്യുആർ കോഡ്, മറ്റ് സാങ്കേതിക വിദ്യകൾ എന്നിവയുൾപ്പെടെയുള്ള ഇടപാടുകൾക്കായുള്ള ആർബിഐ മാനദണ്ഡങ്ങൾ പാലിക്കുന്നില്ലെന്ന് തോന്നിയാൽ ഉപയോക്താവിന് ഇവിടെ പരാതിപ്പെടാം. ഗുണഭോക്താവിന്റെ അക്കൗണ്ടിലേക്ക് അബദ്ധത്തിൽ ഫണ്ട് അയച്ചാലും ഓംബുഡ്സ്മാനോട് പരാതിപ്പെടാം.
ചാടികയറി ഓൺലൈൻ ഇടപാടുകൾ നടത്താതിരിക്കാൻ പ്രത്യേകം ശ്രദ്ധിക്കണം. സ്വീകർത്താവിന്റെ യുപിഐ ഐഡി, ഫോൺ നമ്പർ, കൈമാറ്റം ചെയ്യപ്പെടുന്ന തുക, അയക്കുന്ന ആളുടെ അക്കൗണ്ടിന്റെ യുപിഐ പിൻ എന്നിവ നൽകുമ്പോൾ ശ്രദ്ധിക്കണം. ഇവയിൽ ഏതെങ്കിലും തെറ്റിയാൽ വലിയ വില കൊടുക്കേണ്ടി വരും. അതുകൊണ്ട് തെറ്റുകൾ ഒഴിവാക്കാൻ പ്രത്യേകം ശ്രദ്ധിക്കേണ്ടതാണ്.
