പത്തനംതിട്ട: കേരളത്തിന്റെ പൈതൃക ജലോത്സവമായ ആറന്മുള ഉത്രട്ടാതി ജലമേളയ്ക്ക് ഇന്ന് ആവേശത്തുടക്കം. ഉച്ചയ്ക്ക് 1.30ന് ഉപരാഷ്ട്രപതി സി.പി. രാധാകൃഷ്ണൻ ജലമേള ഉദ്ഘാടനം ചെയ്യും. 33 വർഷത്തിന് ശേഷമാണ് ഒരു ഉപരാഷ്ട്രപതി ആറന്മുള ജലമേളയിൽ പങ്കെടുക്കുന്നത്.
ഇത്തവണ 51 പള്ളിയോടങ്ങളാണ് ജലമേളയിൽ അണിനിരക്കുന്നത്. സത്രം കോമ്പൗണ്ടിൽ നടക്കുന്ന ഉദ്ഘാടന ചടങ്ങിൽ ഗവർണർ രാജേന്ദ്ര വിശ്വനാഥ് ആർലേക്കർ അധ്യക്ഷത വഹിക്കും. പള്ളിയോടങ്ങളുടെ പാരമ്പര്യവും വഞ്ചിപ്പാട്ടിന്റെ ആവേശവും പമ്പയാറ്റിലെ ജലോത്സവത്തിന്റെ ഭംഗിയും ഒത്തുചേരുന്ന ദിനത്തിനാണ് ആറന്മുള സാക്ഷ്യം വഹിക്കുക.
അതേസമയം, ചരിത്രപ്രസിദ്ധമായ അഷ്ടമിരോഹിണി വള്ളസദ്യ സെപ്റ്റംബർ നാലിന് ആറന്മുള ക്ഷേത്രമുറ്റത്ത് നടക്കും. വള്ളസദ്യയുടെ ഒരുക്കങ്ങൾ പുരോഗമിക്കുകയാണെന്ന് പള്ളിയോട സേവ സംഘം ഭാരവാഹികൾ അറിയിച്ചു.
സംസ്ഥാന ടൂറിസം വകുപ്പിന്റെ നേതൃത്വത്തിൽ സംഘടിപ്പിച്ച ഓണം വാരാഘോഷത്തിനും ഇന്ന് സമാപനമാകും. വൈകിട്ട് അഞ്ചിന് നടക്കുന്ന സാംസ്കാരിക ഘോഷയാത്ര ഉപരാഷ്ട്രപതി സി.പി. രാധാകൃഷ്ണൻ ഫ്ലാഗ് ഓഫ് ചെയ്യും.
ലോക്ഭവൻ സമീപത്തുനിന്ന് ആരംഭിക്കുന്ന ഘോഷയാത്ര കിഴക്കേക്കോട്ടയിലാണ് സമാപിക്കുക. ഗവർണർ രാജേന്ദ്ര വിശ്വനാഥ് ആർലേക്കർ, മുഖ്യമന്ത്രി വി.ഡി. സതീശൻ, മന്ത്രിമാർ ഉൾപ്പെടെയുള്ള പ്രമുഖർ പങ്കെടുക്കും.
സർക്കാർ വകുപ്പുകളുടെയും വിവിധ സ്ഥാപനങ്ങളുടെയും 69 ഫ്ലോട്ടുകളും 99 കലാരൂപങ്ങളും ഘോഷയാത്രയിൽ അണിനിരക്കും. പ്രാദേശിക കലാസംഘങ്ങളുടെ പ്രകടനങ്ങൾ, സ്കേറ്റിംഗ് സംഘത്തിന്റെ അഭ്യാസപ്രകടനങ്ങൾ, വിവിധ കലാപരിപാടികൾ എന്നിവയും ഘോഷയാത്രയ്ക്ക് മാറ്റുകൂട്ടും.
ആറന്മുളയിലെ ജലോത്സവവും തലസ്ഥാനത്തെ ഓണം വാരാഘോഷ സമാപനവും ഒരേ ദിവസം നടക്കുന്നതിനാൽ സംസ്ഥാനത്തിന് ഇന്ന് ആഘോഷപ്പകിട്ടേറിയ ദിനമായിരിക്കും.
