ചെന്നൈ: അജിത്തിനെ നായകനാക്കിയുള്ള ചിത്രം മുടങ്ങിയതിന് പിന്നാലെ പുതിയ ചിത്രത്തെക്കുറിച്ച് ആലോചിക്കുകയാണ് സംവിധായകൻ വിഘ്നേശ് ശിവൻ. എന്നാൽ, ചത്രത്തിലെ നായിക നയൻതാരയല്ല എന്നതാണ് പുറത്ത് വരുന്ന വാർത്തകൾ. നയൻതാരയും വിഘ്നേശും തമ്മിൽ പ്രണയത്തിലായതിന് ശേഷം വിഘ്നേശിന്റെ ചിത്രങ്ങളിലെല്ലാം നയൻതാരയായിരുന്നു നായിക.
നയന്‍താരയും വിജയ് സേതുപതിയും പ്രധാന വേഷത്തില്‍ എത്തിയ നാനും റൗഡി താന്‍ എന്ന ചിത്രമാണ് വിഘ്നേശിന്റെ കരിയറിലെ ബ്രേക്ക് ത്രൂ. അതിന് ശേഷമാണ് വിഘ്നേശും നയന്‍സും തമ്മില്‍ പ്രണയത്തിലുമായി. കാത്തുവാക്കുളെ രണ്ട് കാതല്‍ എന്ന വിഘ്നേശ് സംവിധാനം ചെയ്ത അവസാനത്തെ ചിത്രത്തിലും നയന്‍താര നായികയായിരുന്നു. ഒപ്പം വിജയ് സേതുപതിയും സാമന്തയും ഉണ്ടായിരുന്നു. എന്നാൽ, അജിത്ത് ചിത്രം നഷ്ടപ്പെട്ടതിന് പിന്നാലെ ലൗവ് ടുഡേ സംവിധായകന്‍ പ്രദീപ് രംഘനാഥനെ നായകനാക്കിയാണ് വിഘ്നേശ് പുതിയ സിനിമ ഒരുക്കുന്നത്.
കമല്‍ഹാസന്‍റെ രാജ്കമല്‍ ഫിലിംസ് സിനിമയുടെ നിര്‍മ്മാണം ഏറ്റെടുത്തുവെന്ന് വിവരമുണ്ട്. ഈ സിനിമയിലെ നായികയായി ആദ്യം നിശ്ചയിച്ചിരുന്നത് നയന്‍താരയെയാണ്. എന്നാൽ, പുതിയ റിപ്പോർട്ടുകൾ പ്രകാരം ജാന്‍വി കപൂര്‍ ആയിരിക്കും ഈ സിനിമയിലെ നായിക. ഔദ്യോഗികമായി ഇതിനോട് നയന്‍താരയോ വിഘ്നേശോ പ്രതികരിച്ചിട്ടില്ല. ഇത് സംഭവിച്ചാല്‍ ജാന്‍വിയുടെ കോളിവുഡ് അരങ്ങേറ്റമായിരിക്കും വിഘ്നേശ് ചിത്രം.
