ഇന്ത്യൻ സിനിമാ ചരിത്രത്തിൽ ബോളിവുഡ് നടൻ ഗോവിന്ദയുടെ സുവർണ കാലഘട്ടമുണ്ടായിരുന്നു. ഇക്കാലത്ത് ഗോവിന്ദയുടെ ഡസൻ കണക്കിന് ചിത്രങ്ങളായിരുന്നു റിലീസ് ചെയ്തിരുന്നത്. മിക്കചിത്രങ്ങളും ബോക്സോഫീസിൽ വൻ പരാജയങ്ങളുമായിട്ടുണ്ട്. ബോളിവുഡിൽ ഗോവിന്ദയ്ക്ക് ശേഷം ഏറ്റവും കൂടുതൽ റിലീസുകൾ ഉണ്ടായിരുന്ന താരം അക്ഷയ് കുമാർ ആയിരുന്നു. എന്നാൽ സാമ്പത്തിക പരാജയങ്ങൾ ഉണ്ടാക്കിയ താരമായിരുന്നു അക്ഷയ് കുമാറും. അക്കാലത്ത് തന്നെ ഒരു വർഷം 34 സിനിമകൾ പ്രദർശനത്തിന് എത്തിയ ഒരു മെഗാസ്റ്റാർ ഉണ്ടായിരുന്നു. പ്രദർശനത്തിന് എത്തിച്ച 34 സിനിമകളിൽ 25 ചിത്രങ്ങളും ബോക്സ് ഓഫീസ് ഹിറ്റായിരുന്നു എന്ന പ്രത്യേകതയുമുണ്ട്. ഈ റെക്കോഡ് കൈപ്പിടിയിൽ വെച്ചിരിക്കുന്ന താരം മറ്റാരുമല്ല മലയാള സിനിമയുടെ താരരാജാവും അഭിനയകുലപതിയുമായ മോഹൻലാൽ തന്നെയാണ്.
1986- ലായിരുന്നു മോഹൻലാലിന്റെതായി 34- സിനിമകൾ റിലീസ് ചെയ്ത് അതിൽ 25- ചിത്രങ്ങളും ഹിറ്റാക്കിയത്. എന്നാൽ ഈ റെക്കോഡ് മോഹൻലാലിന് ശേഷം ആർക്കും തകർക്കാൻ കഴിഞ്ഞിട്ടില്ലെന്നതാണ് ശ്രദ്ധേയം. നിന്നിഷ്ടം എന്നിഷ്ടം, മഴപെയ്യുന്നു മദ്ദളം കൊട്ടുന്നു, യുവജനോത്സവം, ഹലോ മൈഡിയർ റോംഗ് നമ്പർ, സന്മനസ്സുള്ളവർക്ക് സമാധാനം, രാജാവിന്റെ മകൻ, ഗാന്ധിനഗർ സെക്കന്റ് സ്ട്രീറ്റ്, താളവട്ടം എന്നിവയായിരുന്നു താരരാജാവിന്റെതായി ആ വർഷം പുറത്തുവന്ന ഹിറ്റ് ചിത്രങ്ങൾ.
40 വർഷത്തോളം നീണ്ട ജൈത്രയാത്രയിൽ 340-തോളം ചിത്രങ്ങളിലാണ് അദ്ദേഹം വേഷമിട്ടത്. ഇതിൽ മിക്കവയും ഹിറ്റ്. 1978-ൽ തിരനോട്ടം എന്ന ചിത്രത്തിലൂടെയാണ് അദ്ദേഹം അഭിനയരംഗത്തേയ്ക്ക് കടന്നു വന്നത്. ദശരഥം, തൂവാനത്തുമ്പികൾ, നാടോടിക്കാറ്റ് തുടങ്ങിയ ചിത്രങ്ങൾക്ക് മോഹൻലാലിന്റെ കരിയറിൽ വലിയ പ്രധാന്യം തന്നെയുണ്ട്. രാം ഗോപാൽ വർമ്മയുടെ കമ്പനി എന്ന ചിത്രത്തിലൂടെയായിരുന്നു മോഹൻലാൽ ബോളിവുഡിൽ അരങ്ങേറ്റം കുറിച്ചത്. അജയ് ദേവ്ഗണിനും വിവേക് ഒബ്റോയിക്കുമൊപ്പം ഒരു കടുത്ത മത്സരം തന്നെയാണ് അദ്ദേഹം അരങ്ങേറ്റ ചിത്രത്തിൽ കാഴ്ചവെച്ചത്. പിന്നീട് അമിതാഭ് ബച്ചൻ നായകനായ ആഗ് ആഗ്, തേസ് തുടങ്ങിയ ചിത്രങ്ങളിലെ പ്രകടനത്തിലൂടെ ബോളിവുഡിലും മോഹൻലാൽ തരംഗം എത്തി. അന്നും ഇന്ത്യൻ സിനിമയുടെ ഇതിഹാസമായി അഭിനയ ജീവിതത്തിന്റെ ജൈത്രയാത്ര തുടരുകയാണ് അദ്ദേഹം.
Comments