പാരീസ്: ഫ്രാൻസിലെ മാഴ്സേയിൽ പുതിയ ഇന്ത്യൻ കോൺസുലേറ്റ് തുടങ്ങുമെന്ന് പ്രധാനമന്ത്രി നരേന്ദ്രമോദി. പാരീസിലെ ലാ സീൻ മ്യൂസിക്കേലിൽ സംഘടിപ്പിച്ച പരിപാടിയിൽ ഇന്ത്യൻ സമൂഹവുമായി സംസാരിക്കവെയാണ് അദ്ദേഹം ഇക്കാര്യം അറിയിച്ചത്. കൂടാതെ കവിയും തത്വചിന്തകനുമായ തമിഴ് ആദ്ധ്യാത്മികാചാര്യൻ തിരുവള്ളുവറിന്റെ പ്രതിമ സ്ഥാപിക്കുമെന്നും അത് ഇന്ത്യയ്ക്ക് ലഭിക്കുന്ന അംഗീകാരമാകുമെന്നും അദ്ദേഹം അറിയിച്ചു. പ്രശസ്ത ഫുട്ബോൾ താരം കിലിയൻ എംബാപ്പെയെക്കുറിച്ചും പ്രധാനമന്ത്രി പരാമർശിച്ചു. ഇന്ത്യൻ യുവത്വത്തിനിടയിൽ എംബാപ്പെ സൂപ്പർഹിറ്റാണെന്ന് പറഞ്ഞ മോദി, ഫ്രാൻസിലുള്ളതിനേക്കാൾ ജനപ്രീതി എംബാപ്പെയ്ക്ക് ഇന്ത്യയിലുണ്ടെന്നും അറിയിച്ചു. ഒരുപക്ഷെ, കിലിയൻ എംബാപ്പെയെ ഫ്രഞ്ച് ജനതയേക്കാൾ കൂടുതൽ ഇന്ത്യയിലുള്ളവർക്ക് അറിയാമെന്നായിരുന്നു മോദിയുടെ വാക്കുകൾ.
ജി20 ഉച്ചകോടിക്ക് ഇന്ത്യ അദ്ധ്യക്ഷത വഹിച്ചതിനെക്കുറിച്ചും പ്രധാനമന്ത്രി നരേന്ദ്രമോദി പരാമർശിച്ചു. പുതിയ രീതിയിലേക്ക് ലോകം മുഴുവൻ മാറിയിരിക്കുകയാണ്. അതുപോലെ ഇന്ത്യയുടെ കഴിവിലും പങ്കിലും അതിവേഗമാണ് മാറ്റം വന്നത്. ഇന്ന് ജി20 ഗ്രൂപ്പിന്റെ അദ്ധ്യക്ഷ സ്ഥാനമാണ് ഇന്ത്യ വഹിക്കുന്നതെന്നും രാജ്യത്താകമാനം 200ഓളം കൂടിക്കാഴ്ചകൾ ഉച്ചകോടിയുടെ ഭാഗമായി സംഘടിപ്പിച്ചുവെന്നും പ്രധാനമന്ത്രി പറഞ്ഞു.
