ഡൽഹി: യൂണിഫോം സിവിൽ കോഡിനെ അനുകൂലിച്ച് സംസാരിച്ച കേരളാ ഗവർണർ ആരിഫ് മുഹമ്മദ് ഖാൻ രാജി വെയ്ക്കണമെന്ന് ഓൾ ഇന്ത്യ മജ്ലിസ്-ഇ-ഇത്തേഹാദുൽ മുസ്ലിമീൻ(എഐഎംഐഎം) തലവൻ അസദുദ്ദീൻ ഒവൈസി. ഗവർണർ സർക്കാരിനെ പുകഴ്ത്തേണ്ട ആവശ്യമില്ല എന്നും ആശങ്കകൾ പ്രകടിപ്പിക്കുന്നവരെ സ്വാഗതം ചെയ്യുകയാണ് വേണ്ടതെന്നും ഒവൈസി പറഞ്ഞു. രാജ്യത്തിന്റെ വിവിധ ഇടങ്ങളിൽ നിന്നും യുസിസിയെ അനുകൂലിച്ച് ശബ്ദം ഉയരുന്നതിൽ അസ്വസ്ഥനായിരിക്കുകയാണ് അസദുദ്ദീൻ ഒവൈസി.
ആരെങ്കിലും അവരുടെ ആശങ്കകൾ പ്രകടിപ്പിക്കുകയാണെങ്കിൽ, അത് സ്വാഗതം ചെയ്യണം. ആളുകൾ പറയുന്നതെന്തും സർക്കാർ കേൾക്കണം. സംവേദനക്ഷമതയോടെ അത് മനസ്സിലാക്കണം. ഗവർണർ എന്ന നിലയിൽ ഒരു സർക്കാരിനെയും പുകഴ്ത്തേണ്ട ആവശ്യമില്ല. ആരിഫ് മുഹമ്മദ് ഖാൻ ഗവർണർ പദവി രാജിവച്ച് ഔദ്യോഗികമായി ബിജെപിയിൽ ചേരണം- ഒവൈസി പറഞ്ഞു.
കേന്ദ്രസർക്കാരിനെതിരെയും അസദുദ്ദീൻ ഒവൈസി രംഗത്തു വന്നു. രാജ്യത്തെ പല പ്രശ്നങ്ങളിൽ നിന്നും ജനശ്രദ്ധ തിരിച്ചുവിടാനാണ് ഏകീകൃത സിവിൽ കോഡ് ചർച്ച ചെയ്യുന്നത്. പൊതു തെരഞ്ഞെടുപ്പിന് അഞ്ചോ ആറോ മാസം മുമ്പ് ബിജെപി ഈ വിഷയം ഉന്നയിക്കുന്നു. 2024-ലെ തിരഞ്ഞെടുപ്പിൽ രാഷ്ട്രീയ നേട്ടം കൊയ്യുന്നതിനാണിത് എന്നും ഒവൈസി വാദിച്ചു.
