മലയാള സംഗീത ലോകത്ത് സ്വരമാധുരികൊണ്ട് വളരെയധികം ആരാധകരുള്ള രണ്ട് അതുല്യ പ്രതിഭകളാണ് കെജെ യേശുദാസും എംജി ശ്രീകുമാറും. ഇരുവരുടെയും കൂട്ടുകെട്ടിൽ പുറത്തിറങ്ങിയ ഗാനങ്ങളൊക്കെയും ഇന്നും മലയാളി മനസുകളിൽ മങ്ങലേൽക്കാതെ നിറഞ്ഞു നിൽക്കുന്നുണ്ട്. രണ്ട് ശബ്ദങ്ങളും മലയാളികൾക്ക് ഏറെ പ്രിയമുള്ളതാണ്. ഇപ്പോഴിതാ എംജി ശ്രീകുമാർ പങ്കുവെച്ച ചിത്രമാണ് സമൂഹമാദ്ധ്യമങ്ങളിൽ ശ്രദ്ധേയമാകുന്നത്. യേശുദാസിനൊപ്പമുള്ള താരത്തിന്റെ ചിത്രങ്ങൾ ഇതിനോടകം തന്നെ സമൂഹമാദ്ധ്യമങ്ങളിൽ വൈറലായി.
യേശുദാസിന്റെ അമേരിക്കയിലെ വസതിയിൽ എത്തിയാണ് എംജി ശ്രീകുമാർ ഗാനഗന്ധർവ്വനുമായി കൂടിക്കാഴ്ച നടത്തിയത്. എംജി ശ്രീകുമാറിനൊപ്പം ഭാര്യ ലേഖയും ഉണ്ടായിരുന്നു. മൂന്ന് മണിക്കൂറോളം സംഗീതത്തെ കുറിച്ച് മാത്രമായി സംസാരിച്ചുവെന്ന് എംജി ശ്രീകുമാർ പങ്കുവെച്ച ചിത്രത്തോടൊപ്പം കുറിച്ചു. ശ്രീകുമാറിന്റെ അച്ഛൻ മലബാർ ഗോപാലൻ നായരും യേശുദാസിന്റെ പിതാവ് അഗസ്റ്റിൻ ജോസഫും ഒരുമിച്ച് നാടകങ്ങളിൽ പാടിയ കാര്യങ്ങളും കുറിപ്പിലുണ്ട്. താരം പങ്കുവെച്ച ചിത്രത്തിൽ ഇരുവരുടെയും ഭാര്യമാരെയും കാണാം.
എംജി ശ്രീകുമാറിന്റെ വാക്കുകൾ…
‘ ധന്യമാം നിമിഷങ്ങൾ. അമേരിക്കയിൽ ദാസേട്ടന്റെ വീട്ടിൽ ഏകദേശം മൂന്ന് മണിക്കൂറോളം സംഗീതത്തെ കുറിച്ച് മാത്രം സംസാരിച്ചു. എന്റെ അച്ഛൻ മലബാർ ഗോപാലൻ നായരും, ദാസേട്ടന്റെ അച്ഛൻ അഗസ്റ്റിൻ ജോസഫ് സാറും, സമകാലീനരും ഒരുമിച്ച് നാടകത്തിൽ പാടി അഭിനയിച്ചവരും ആയിരുന്നു. അങ്ങനെ കുടുംബവുമായുള്ള ബന്ധം. ഒപ്പം പ്രഭ ചേച്ചിയും, ലേഖയും. ലവ് യൂ ദാസേട്ടാ.’
Comments