കോട്ടയം: ഉമ്മൻചാണ്ടിയുടെ വിയോഗത്തിൽ അനുശോചിച്ച് നടൻ കുഞ്ചാക്കോ ബോബൻ. തന്റെ കുടുംബ സുഹൃത്ത് കൂടിയാണ് അദ്ദേഹമെന്ന് നടൻ പറഞ്ഞു. വ്യക്തിപരമായും കുടുംബപരമായും ഉമ്മൻചാണ്ടിയെ അറിയാമെന്നും കുഞ്ചാക്കോ ബോബൻ പറഞ്ഞു.
ഉമ്മൻചാണ്ടിയുടെ വീട്ടിലേക്ക് ഒരു മുന്നറിയിപ്പുമില്ലാതെ കയറിച്ചെല്ലാൻ കഴിയും. എനിക്കെന്നല്ല, എല്ലാവർക്കും അതുപോലെ കയറിച്ചെല്ലാൻ കഴിയും. എല്ലാവരേയും ഒരു പോലെ കാണുന്ന നേതാവാണ് ഉമ്മൻചാണ്ടി. പുലർച്ചെ ഒന്നര കഴിഞ്ഞ് ഒരിക്കൽ വീട്ടിൽ ചെന്ന ദിവസം ഫയൽ കൂമ്പാരത്തിനിടയിലിരിക്കുന്ന ഉമ്മൻചാണ്ടിയെയാണ് കണ്ടത്. ആ സമയത്തും അദ്ദേഹം ജനങ്ങൾക്കു വേണ്ടി പ്രവർത്തിക്കുകയായിരുന്നു.
ഇടയ്ക്ക് ഫോൺ കോളുകളും വരുന്നുണ്ടായിരുന്നു. ആ വൈകിയ നേരത്ത് ഒരു സൗഹൃദ സംഭാഷണത്തിന് എനിക്ക് തോന്നിയില്ല. അപ്പോഴും തിരക്കിലായിരുന്നു അദ്ദേഹം. ഉമ്മൻചാണ്ടിയെക്കുറിച്ച് ഓർക്കുമ്പോൾ ആദ്യം ഈ സംഭവമാണ് ഓർമ്മ വരുന്നത്. ആരോഗ്യം പോലും കണക്കിലെടുക്കാതെ ജനങ്ങൾക്ക് വേണ്ടി പ്രവർത്തിക്കുന്നയാളാണ് ഉമ്മൻചാണ്ടിയെന്നും താരം പറഞ്ഞു.
Comments