ലോകത്തെ ഏറ്റവും വലിയ ബയോമെട്രിക് തിരിച്ചറിയൽ രേഖയായി ആധാർ മാറിക്കഴിഞ്ഞു. ആധാർ കാർഡ് സംബന്ധിച്ച് പ്രധാനമായും ചെയ്തിരിക്കേണ്ട ഒന്നാണ് മൊബൈൽ നമ്പർ അപ്ഡേറ്റ് ചെയ്യുന്നത്. എന്നാൽ ആധാറിൽ നൽകിയിരിക്കുന്ന മൊബൈൽ നമ്പറിൽ മാറ്റം വന്നാൽ എന്താണ് ചെയ്യേണ്ടതെന്ന കാര്യത്തിൽ പലർക്കും ധാരണയുണ്ടാകില്ല. അടുത്തിടെ മൊബൈൽ നമ്പർ മാറിയിട്ടും അത് അപ്ഡേറ്റ് ചെയ്തിട്ടില്ലെങ്കിൽ അടുത്തുള്ള ആധാർ സേവന കേന്ദ്രം സന്ദർശിച്ച് മാറ്റം വരുത്താവുന്നതാണ്.
ആധാർകാർഡിൽ രജിസ്റ്റർ ചെയ്ത മൊബൈൽ നമ്പർ മാറ്റുന്നത് എങ്ങനെ…
UIDAI വെബ്സൈറ്റിൽ (uidai.gov.in), ‘എൻറോൾമെന്റ് സെന്റർ കണ്ടെത്തുക” എന്ന ഓപ്ഷനിൽ ക്ലിക്ക് ചെയ്യുക. ഇത് മൊബൈൽ നമ്പർ അപ്ഡേറ്റ് ചെയ്യാൻ കഴിയുന്ന ഏറ്റവും അടുത്തുള്ള ആധാർ എൻറോൾമെന്റ് സെന്റർ കണ്ടെത്താൻ സഹായിക്കും. ആധാർ എൻറോൾമെന്റ് സെന്ററിലെ ആധാർ ഹെൽപ്പ് എക്സിക്യൂട്ടീവിനെ സമീപിക്കുക. ഫോൺ നമ്പർ അപ്ഡേറ്റ് ചെയ്യുന്നതിന് തെറ്റുകൾ വരുത്താതെ കൃത്യമായ വിവരങ്ങൾ പൂരിപ്പിച്ച് ഫോം സമർപ്പിക്കണം. ആധാർ കാർഡിലെ ഫോൺ നമ്പർ അപ്ഡേറ്റ് ചെയ്യുന്നതിന് 50 രൂപയാണ് ഫീസ് നൽകേണ്ടത്.
ആധാർ ഹെൽപ്പ് എക്സിക്യൂട്ടീവിന് സമർപ്പിച്ച ഫോം അവർ അത് കൃത്യമായി അവലോകനം ചെയ്യും. ഐഡന്റിറ്റി പ്രൂഫ്, അഡ്രസ് പ്രൂഫ്, നിലവിലുള്ള ആധാർ കാർഡ് എന്നിവ പോലെ ആവശ്യമായ എല്ലാ സഹായ രേഖകളും കൈവശം ഉണ്ടാകണം. ഫീസ് പേയ്മെന്റ് പൂർത്തിയാകുന്നതോടെ ആധാർ ഹെൽപ്പ് എക്സിക്യൂട്ടീവ് ഒരു അപ്ഡേറ്റ് അഭ്യർത്ഥന നമ്പർ (യുആർഎൻ) സ്ലിപ്പ് നൽകും. ഇതിലൂടെ മൊബൈൽ നമ്പർ അപ്ഡേറ്റ് അഭ്യർത്ഥനയുടെ സ്റ്റാറ്റസ് ട്രാക്ക് ചെയ്യാൻ യുആർഎൻ സഹായിക്കും.
myaadhaar.uidai.gov.in എന്ന യുഐഡിഎഐയുടെ ഔദ്യോഗിക വെബ്സൈറ്റ് സന്ദർശിച്ച് മൊബൈൽ നമ്പർ അപ്ഡേറ്റിന്റെ പുരോഗതി നിരീക്ഷിക്കാൻ സാധിക്കും. ‘ചെക്ക് എൻറോൾമെന്റ്’ വിഭാഗത്തിൽ ക്ലിക്ക് ചെയ്ത് മറ്റ് വിശദാംശങ്ങൾക്കൊപ്പം URN നൽകുക. ഇതോടെ മൊബൈൽ നമ്പർ അപ്ഡേറ്റ് അഭ്യർത്ഥനയുടെ നിലവിലെ നില അറിയാനാകും.
