ഒരു മീനിന് വില 20,000 രൂപ.. ഇക്കാര്യം പറഞ്ഞാൽ ആരെങ്കിലും വിശ്വസിക്കുമോ.. എന്നാൽ സംഭവം സത്യമാണ്. ഗോദാവരി നദിയിൽ നിന്ന് ലഭിക്കുന്ന പുലാസയുടെ വിലയാണ് കുതിക്കുന്നത്. ഗോദാവരി നദിയിൽ നിന്ന് ലഭിക്കുന്ന മീന് കിലോഗ്രാമിന് 5000 രൂപ മുതൽ 17,000 രൂപ വരെയാണ് വില. ലേലം വിളിക്കുന്നതോടെയാണ് ഒരു മിനിന്റെ വില 20,000 കടന്നത്.
ചേപാല പുലുസു എന്ന ഡിഷിൽ നിന്നാണ് മത്സ്യത്തിന് ഈ പേര് ലഭിച്ചതെന്നാണ് പ്രദേശവാസികൾ പറയുന്നത്. പ്രജനന കാലത്തിന് ശേഷം ഈ മീൻ ജീവിക്കില്ല. ഉപ്പ് വെള്ളത്തിൽ നിന്ന് സാധാരണ വെള്ളത്തിലേക്ക് മാറുമ്പോൾ മത്സ്യത്തിന് രുചിയിലും ഗുണങ്ങളിലും വ്യത്യാസമുണ്ടാവുന്നു. മലിനീകരണവും കൂടുതൽ മത്സ്യബന്ധനവും കാരണവും വംശനാശത്തിന്റെ വക്കിലാണ് പുലാസ.
ഗോദാവരിയിൽ മൺസൂൺ കാലത്ത് കുടുംബാംഗങ്ങൾ എല്ലാം ഒത്ത് പുലാസ മീൻകറി ഉണ്ടാക്കുന്നത് ഒരു ആചാരമാണത്രെ.താലിമാല വിറ്റാലും പുലാസ കഴിക്കണമെന്നാണ് ആന്ധ്രക്കാരുടെ ഇടയിലെ ചൊല്ല് . രുചിയേറിയ ഈ മത്സ്യം ലഭിക്കുന്നതും മഴക്കാലത്താണ്.ഇവിടുത്തെ എല്ലാ മത്സ്യ മാർക്കറ്റുകളിലും മീൻ ലഭിക്കും. സീസണിൽ ദിവസേന 50 കിലോഗ്രാമിനടുത്ത് മീൻ ലഭിക്കാറുണ്ട്.
ആന്ധ്രാപ്രദേശിന് പുറമേ തെലങ്കാന, മഹാരാഷ്ട്ര, തമിഴ്നാട് എന്നിവിടങ്ങളിലും പുലാസയ്ക്ക് ഡിമാൻഡ് ഉണ്ട്. ജൂലൈ മുതൽ സെപ്തംബർ വരെയുള്ള കാലായളവിലാണ് ഗോദാവരി നദിയിൽ നിന്ന് ഈ മത്സ്യം ലഭിക്കുന്നത്.എല്ലാ വർഷവും അഡ്വാൻസ് നൽകി പോലും മീൻ നേരത്തെ ബുക്ക് ചെയ്യുന്നവരുണ്ട്.ആന്ധ്രയിൽ കൈക്കൂലിയായും പുലാസ നൽകുന്നവരുണ്ട്. പരമ്പരാഗത രീതിയിൽ തന്നെയാണ് മീൻ കറി തയ്യാറാക്കുന്നത്. എന്നാൽ മത്സ്യത്തിന് തീ വില വരാനുള്ള കാരണം വ്യക്തമല്ല. ശുദ്ധ ജല മത്സ്യമാണെന്നതും രുചിയും തന്നെയാണ് ഡിമാൻഡ് ഉയർത്തുന്നത്.
