2009-ൽ തിയേറ്ററുകളിലെത്തി പ്രേക്ഷക സ്വീകാര്യത നേടിയ ചിത്രമാണ് തീലത്താമര. എംടി വാസുദേവൻ നായർ എഴുതി ലാൽ ജോസ് സംവിധാനം ചെയ്ത ചിത്രമാണ് ഇത്. ഈ ചിത്രത്തിലൂടെയാണ് അർച്ചന കവി എന്ന അഭിനേത്രിയെ മലയാള സിനിമയ്ക്ക് ലഭിക്കുന്നതും. 1979-ൽ പുറത്തിറങ്ങിയ ചിത്രത്തിന്റെ റീമേക്ക് ആയിരുന്നിട്ട് കൂടി സിനിമയും പാട്ടും അഭിനേതാക്കളുമെല്ലാം വളരെപെട്ടെന്ന് തന്നെ പ്രേക്ഷക മനസുകളിൽ ഇടം നേടി. കൈലാഷ് ആയിരുന്നു നായകവേഷത്തിൽ എത്തിയത്. കൂടാതെ സംവൃത സുനിൽ ഉൾപ്പെടെ മുൻനിര താരങ്ങളും ചിത്രത്തിൽ അണി നിരന്നിരുന്നു.
ഇപ്പോഴിതാ സിനിമ റീലിസ് ആയി പതിനൊന്ന് വർഷങ്ങൾക്ക് ശേഷം ചിത്രത്തിലെ നായികമാർ തമ്മിൽ നടത്തിയ കൂടിക്കാഴ്ചയുടെ ചിത്രങ്ങളാണ് സമൂഹമാദ്ധ്യമങ്ങളിൽ വൈറലാകുന്നത്. നീണ്ട ഇടവേളയ്ക്ക് ശേഷമുള്ള കൂടിക്കാഴ്ചയുടെ സന്തോഷം അർച്ചനാ കവി പങ്കുവെച്ചു. നീലത്താമരയിൽ രത്നം എന്ന കഥാപാത്രത്തെ അവതരിപ്പിച്ചത് സംവൃത സുനിൽ ആയിരുന്നു. ചിത്രത്തിൽ കുഞ്ഞിമാളു എന്ന കഥാപാത്രത്തെയാണ് അർച്ചന അവതരിപ്പിച്ചത്. താരത്തെയും മകൻ അഗസ്ത്യയേയും വർഷങ്ങൾക്ക് ശേഷം നേരിൽ കണ്ടതിന്റെ സന്തോഷമാണ് അർച്ചനാ കവി ഇൻസ്റ്റഗ്രാമിൽ പങ്കുവെച്ചത്. ഒരു ചെറിയ കുറിപ്പോടുകൂടിയാണ് താരം ചിത്രം പോസ്റ്റ് ചെയ്തിരിക്കുന്നത്.
‘ 11 വർഷങ്ങൾക്ക് ശേഷം വീണ്ടും സംവൃത സുനിലിനെ കണ്ടുമുട്ടി. പഴയ ആ ഫീൽ തന്നെയാണ് ഇപ്പോഴും അനുഭവപ്പെടുന്നത്. ആ പുഞ്ചിരിക്ക് എത്ര ഉത്കണ്ഠയെയും ശാന്തമാക്കാൻ സാധിക്കും. വീട്ടിൽ ആണെന്നുള്ള ഒരു പ്രതീതിയാണ് സൃഷ്ടിച്ചത്. വളരെയധികം സഹാനുഭൂതിയുള്ള ഒരു മിടുക്കനാണ് അഗസ്ത്യ. എനിയ്ക്ക് ഇപ്പോഴും അവന്റെ ചിരിയിൽ നിന്നും തിരകെ വരാൻ കഴിഞ്ഞിട്ടില്ല. ലവ് യൂ കുഞ്ഞേ’- എന്നായിരുന്നു അർച്ചനാ കവി കുറിച്ചത്.
വിവാഹശേഷം അഭിനയത്തിന്റെ തിരക്കുകളിൽ നിന്നെല്ലാം മാറി കുടുംബ ജീവിതം ആസ്വദിക്കുകയാണ് സംവൃതാ സുനിൽ. ഭർത്താവിനും മക്കൾക്കുമൊപ്പം അമേരിക്കയിലാണ് താരം ഇപ്പോൾ താമസം.
