ലോകമെമ്പാടും ആരാധകരുള്ള താരമാണ് അവതാരകനും കൊമേഡിയനുമാണ് സ്റ്റീവ് ഹാർവി. അവതരണത്തിൽ തന്റേതായ ഒരു ഇടം സ്റ്റീവ് സ്വന്തമാക്കിയിട്ടുണ്ട്. ഇപ്പോഴിതാ താൻ മരിച്ചെന്ന തരത്തിൽ പ്രചരിക്കുന്ന വ്യാജ വാർത്തകളോട് പ്രതികരിച്ചിരിക്കുകയാണ് അദ്ദേഹം. സ്റ്റീവ് ഹാർവിക് ആദരാഞ്ജലികൾ അർപ്പിച്ചുകൊണ്ട് ഇതിനോടകം സോഷ്യൽ മീഡിയയിൽ നിരവധി പോസ്റ്റുകളും നിറഞ്ഞിരുന്നു. ഇതിനെല്ലാം മറുപടിയായി ട്വിറ്ററിൽ സ്വന്തം ഫോട്ടോയ്ക്കൊപ്പം രസകരമായ ക്യാപ്ഷനും പങ്കുവെച്ചാണ് സ്റ്റീവ് വ്യാജമരണവാർത്തയോട് പ്രതികരിച്ചത്.
തന്റെ ഫോണിൽ വ്യാജവാർത്തകൾ വായിക്കുന്ന ചിത്രമാണ് സ്റ്റീവ് പങ്കുവെച്ചിരിക്കുന്നത്. ‘ആർ.ഐ.പി. ഹാർവി ട്രെൻഡിങ് ആയിരിക്കുന്നത് നോക്കിക്കാണുന്ന ഞാൻ’ എന്ന ക്യാപ്ഷനാണ് അദ്ദേഹം ട്വീറ്റ് ചെയ്തത്. ഉടൻ തന്നെ ആരാധകർ ഹാർവിയുടെ ട്വീറ്റ് ഏറ്റെടുക്കുകയും ചെയ്തു. വ്യാജ വാർത്തകൾ പുറത്ത് വിടുന്നവർക്കുള്ള ഏറ്റവും ഉത്തമമായ മറുപടിയാണ് ഇതെന്നും ഹാർവി പറഞ്ഞു.
കഴിഞ്ഞ മാർച്ചിലായിരുന്നു ആദ്യമായി സ്റ്റീവ് ഹാർവി മരിച്ചെന്ന തരത്തിലുള്ള വാർത്തകൾ പ്രചരിച്ച് തുടങ്ങിയത്. എങ്ങനെ, എവിടെ വെച്ചാണ് മരിച്ചത് എന്ന് വരെ വാർത്തകൾ പുറത്തു വന്നിരുന്നു. താൻ മരിച്ചെന്ന തരത്തിലുള്ള വാർത്തകൾ വർദ്ധിച്ചു വന്ന സാഹചര്യത്തിലാണ് സ്റ്റീവ് ഹാർവി തന്നെ ട്വീറ്റുമായി രംഗത്തെത്തിയത്.
