ന്യൂഡൽഹി: ടെസ്റ്റ് ക്രിക്കറ്റിൽ ഏറ്റവും കൂടുതൽ റൺസ് നേടുന്ന അഞ്ചാമത്തെ ഇന്ത്യൻ ക്രിക്കറ്റ് താരമെന്ന വീരേന്ദർ സെവാഗിന്റെ റെക്കോർഡ് മറികടന്ന് വിരാട് കോഹ്ലി. വ്യാഴാഴ്ച ട്രിനിഡാഡിലെ ക്വീൻസ് പാർക്ക് ഓവലിൽ വെസ്റ്റ് ഇൻഡീസിനെതിരായ രണ്ടാം ടെസ്റ്റ് മത്സരത്തിനിടെയാണ് കോഹ്ലി ഈ നേട്ടം കൈവരിച്ചത്. സെവാഗിന്റെ 8586 റൺസ് മറികടക്കാൻ 32 റൺസ് വേണ്ടിയിരുന്ന വിരാട്, അദ്ദേഹത്തെ മറികടന്നതിനൊപ്പം ടെസ്റ്റ് ക്രിക്കറ്റിൽ 8625 റൺസ് നേടിയ മുൻ ഓസ്ട്രേലിയൻ താരം മാത്യു ഹെയ്ഡനെ പിന്നിലാക്കുകയും ചെയ്തു. ടെസ്റ്റ് ക്രിക്കറ്റിൽ ഇന്ത്യയ്ക്കായി ഏറ്റവും കൂടുതൽ റൺസ് നേടുന്ന അഞ്ചാമത്തെ താരമെന്ന റെക്കോർഡ് താരം ഇതോടെ തന്റെ പേരിലാക്കി. 111 ടെസ്റ്റുകളിൽ നിന്ന് 49.38 ശരാശരിയോടെ 8642 റൺസും 28 സെഞ്ച്വറികളും കോഹ്ലി നേടിയിട്ടുണ്ട്.
ഏറ്റവും കൂടുതൽ ടെസ്റ്റ് റൺസ് നേടിയ താരങ്ങളുടെ പട്ടികയിൽ ക്രിക്കറ്റ് ഇതിഹാസം സച്ചിൻ തെണ്ടുൽക്കറാണ് മുന്നിൽ. 200 ടെസ്റ്റ് മത്സരങ്ങളിൽ നിന്ന് 53.78 ശരാശരിയിൽ 15,921 റൺസാണ് താരത്തിന്റെ പേരിലുളളത്. 164 ടെസ്റ്റുകളിൽ നിന്ന് 13288 റൺസുമായി രാഹുൽ ദ്രാവിഡാണ് രണ്ടാം സ്ഥാനത്ത്. പട്ടികയിൽ ടെസ്റ്റ് ക്രിക്കറ്റിൽ 10,000 റൺസ് തികയ്ക്കുന്ന ആദ്യ താരമായ സുനിൽ ഗവാസ്കർ 125 മത്സരങ്ങളിൽ നിന്ന് 10122 റൺസുമായി മൂന്നാം സ്ഥാനത്തും വിവിഎസ് ലക്ഷ്മൺ 134 മത്സരങ്ങളിൽ നിന്ന് 8781 റൺസുമായി നാലാം സ്ഥാനത്തുമാണ്.
