ക്രൈം ത്രില്ലർ; ‘കുരുക്ക്’ ഫസ്റ്റ് ലുക്ക് പോസ്റ്റർ പുറത്ത്

ക്രൈം ത്രില്ലർ ചിത്രമായ കുരുക്കിന്റെ ഫസ്റ്റ് ലുക്ക് പോസ്റ്റർ പുറത്ത്. നവാഗതനായ അഭിജിത്ത് നൂറണി തിരക്കഥ രചിച്ച് സംവിധാനം ചെയ്യുന്ന ചിത്രമാണ് ‘കുരുക്ക്’ ചിത്രത്തിന്റെ ഫസ്റ്റ്‌ലുക്ക് പോസ്റ്റർ പ്രമുഖ ചലച്ചിത്ര താരങ്ങളുടെ ഔദ്യോഗിക ഫേസ്ബുക്ക് പേജിലൂടെ പുറത്തിറക്കി.

ഐ.ടി.ഉദ്യോഗസ്ഥരായ റൂബിൻ – സ്‌നേഹ ദമ്പതിമാരുടെ മരണത്തിന്റെ ചുരുളഴിയാതെ കിടക്കുന്ന സംഭവങ്ങൾ തുറന്നുകാട്ടുന്ന ചിത്രമാണിത്. അനിൽ ആന്റോയാണ് ചിത്രത്തിൽ കേന്ദ്രപാത്രമാകുന്നത്. സിഐ സാജൻ ഫിലിപ്പിനെ അവതരിപ്പിക്കുന്ന അനിൽ ആന്റോയുടെ ചിത്രത്തോടൊപ്പമാണ് പോസ്റ്റർ ഇറങ്ങിയിരിക്കുന്നത്.

നിഷാ ഫിലിംസിന്റെ ബാനറിൽ ഷാജി പുനലാലാണ് ചിത്രം നിർമ്മിക്കുന്നത്. സെക്കന്റ് ഷോ എന്ന ചിത്രത്തിലൂടെ അഭിനയ രംഗത്തെത്തിയ നടനാണ് അനിൽ ആന്റോ. തുടർന്ന് ഇമ്മാനുവൽ, ആർ.ജെ. മഡോണ, നാലാംമുറ, ന്റിക്കാക്കാക്കൊരു പ്രേമണ്ടാർന്ന് തുടങ്ങിയ ചിത്രങ്ങളിലും ശ്രദ്ധേയമായ വേഷങ്ങൾ അവതരിപ്പിച്ചു.
ബാലാജി ശർമ്മ, മീരാ പ്രദീപ്, മഹേഷ്, ശ്രീജിത്ത് ശീകാന്ത്, സുബിൻ, ടാർസൻ എന്നിവരും ചിത്രത്തിൽ പ്രധാന വേഷങ്ങളിലെത്തുന്നു. യു.എസ്. ദീക്ഷിതാണ് സംഗീതം ഒരുക്കുന്നത്. ഛായാഗ്രഹണം -റെജിൻ സാന്റോ. കലാസംവിധാനം – രതീഷ് വലിയ കളങ്ങര.