തിരുവനന്തപുരം: പാർട്ടിയ്ക്ക് ഗതാഗത വകുപ്പ് വേണ്ടെന്ന് കേരള കോൺഗ്രസ് ബി. മുന്നണി ധാരണ പ്രകാരം മന്ത്രി ആന്റണി രാജുവിൽ നിന്നാണ് കെബി ഗണേഷ് കുമാർ മന്ത്രി സ്ഥാനം ഏറ്റെടുക്കേണ്ടത്. എന്നാൽ ലഭിക്കുന്നത് ഗതാഗത വകുപ്പാണെങ്കിൽ മന്ത്രിയാകേണ്ടതില്ലെന്നാണ് കേരള കോൺഗ്രസ് ബി സംസ്ഥാന യോഗം ഗണേഷ് കുമാറിനോട് ആവശ്യപ്പെട്ടിരിക്കുന്നത്.
ധാരണ പ്രകാരം രണ്ടര വർഷം വീതമാണ് ജനാധിപത്യ കേരള കോൺഗ്രസിനും കേരള കോൺഗ്രസ് ബിയ്ക്കും മന്ത്രി സ്ഥാനം ലഭിക്കുക. ആദ്യ പകുതിയിൽ ആന്റണി രാജു മന്ത്രിയായിരുന്നു. എൻസിപി കാലങ്ങളായി കൈവശംവെച്ചിരുന്ന ഗതാഗത വകുപ്പാണ് ആന്റണി രാജുവിന് ലഭിച്ചത്. എന്നാൽ രണ്ടാം പകുതിയിൽ മന്ത്രിസ്ഥാനം ലഭിക്കുന്ന തങ്ങൾക്ക് ഈ വകുപ്പ് വേണ്ടെന്നാണ് കേരള കോൺഗ്രസ് ബിയുടെ തീരുമാനം.
ഇക്കാര്യം മുന്നണിയിൽ ആവശ്യപ്പെടും. സാംസ്കാരിക വകുപ്പ് ആവശ്യപ്പെടാനാണ് സാദ്ധ്യത. ഇത്തരത്തിൽ ഗണേഷ് കുമാറിന്റെയും പാർട്ടിയുടെയും ആവശ്യങ്ങൾ അംഗീകരിക്കുകയാണെങ്കിൽ ഇടത് സർക്കാരിനെ മന്ത്രിമാരിൽ പലരുടെയും വകുപ്പുകൾ മാറും.
