‘മനോഹരി രാധേ രാധേ’ എന്ന് തുടങ്ങുന്ന ഗാനവുമായി നന്ദഗോവിന്ദം ഭജൻസാണ് ഇപ്പോൾ സമൂഹമാദ്ധ്യമ ലോകത്ത് തരംഗം തീർക്കുന്നത്. ക്ലാസ്മേറ്റ്സ് സിനിമയിലെ ‘കാത്തിരുന്ന പെണ്ണല്ലേ’ എന്ന മനോഹരമായ ഗാനത്തിലെ ചില വരികളാണ് ‘മനോഹരി രാധേ രാധേ’ എന്നത്. ഗാനത്തിലെ ഈ ഭാഗം ഇഷ്ടപ്പെടുന്നവർക്ക് വീണ്ടും ഒരു നൊസ്റ്റാൾജിക് ഫീൽ നൽകുകയാണ് ഒരുകൂട്ടം യുവാക്കൾ നയിക്കുന്ന നന്ദഗോവിന്ദം ഭജൻസ്. സ്വദേശത്തും വിദേശത്തുമായി നിരവധി വേദികളിൽ ഈ സംഘം ഭജൻസ് അവതരിപ്പിച്ചിട്ടുണ്ട്. ഗ്രാമഫോണിലെ പൈക്കുറുമ്പിയെ മേയ്ക്കും എന്ന ഗാനവും മഹാവീരിയറിലെ രാധേ രാധേ എന്ന ഗാനവും ഒരുമിച്ചുള്ള ഭജനും സോഷ്യൽ മീഡിയയിൽ തരംഗം സൃഷ്ടിച്ചിരുന്നു.
കോട്ടയം ജില്ലയിലാണ് വർഷങ്ങൾക്ക് മുൻപ് ക്ഷേത്രങ്ങളിൽ ഭജനയും, ഭക്തി ഗാനങ്ങളും അവതരിപ്പിക്കാനായി നന്ദഗോവിന്ദം എന്ന പേരിൽ ഒരു കൂട്ടായ്മ ആരംഭിച്ചത്. സംഗീതത്തെ ഇഷ്ടപ്പെടുന്ന ഈ സൗഹൃദസംഘം ഒരിക്കൽപ്പോലും തങ്ങളെ സംഗീതപ്രേമികൾ സ്വീകരിക്കുമെന്ന് കരുതിയിരുന്നില്ല.കേരളത്തിൽ അങ്ങോളമിങ്ങോളം നിരവധി വേദികളിൽ സാമ്പ്രദായിക ഭജന അവതരണത്തിലൂടെ പ്രശസ്തമായ ആ കൂട്ടായ്മയിലെ പ്രധാന അംഗങ്ങളിൽ ചിലർ ജോലിയുടെ ഭാഗമായി ദുബായിലേക്ക് ചേക്കേറിയതോടെയാണ് ഇവിടെയും ഈ സംഗീത കൂട്ടായ്മ രൂപപ്പെടുന്നത്. നവീൻ മോഹൻ, പ്രവീൺ, കണ്ണൻ, ശ്രീജിത്ത്, ഹരി, അജേഷ്, കൃഷ്ണപ്രസാദ്,സായി,ശ്രീധർശൻ,സിദ്ധാർത്ഥ് തുടങ്ങിയവരാണ് നന്ദഗോവിന്ദം ഭജൻസ് എന്ന കൂട്ടായ്മയിലെ അംഗങ്ങൾ.
നന്ദഗോവിന്ദം ഭജൻസിലെ പ്രധാന ഗായകരിൽ ഒരാളായ നവീൻ മോഹന്റെ നേതൃത്വത്തിലായിരുന്നു കൂട്ടായ്മക്കായുളള ശ്രമം. ജോലിയുടെ ഇടവേളകളിലും, ഒഴിവു സമയങ്ങളിലും ഒത്തുചേർന്ന് ഇവർ പരിശീലനം നടത്തി. വാദ്യോപകരണങ്ങൾ വായിക്കുന്നവരെ കണ്ടെത്തി. നന്ദഗോവിന്ദം കൂട്ടായ്മയിൽ ഉണ്ടായിരുന്നവരിൽ ചിലർ ജോലി സംബന്ധമായി ദുബായിലേക്കെത്തിയതോടെയാണ് സംഗീത കൂട്ടായ്മ രൂപം കൊണ്ടത്.ഭക്തിരസ പ്രധാനമായ സാമ്പ്രദായിക ഭജനകളെ കൂടുതൽ ജനകീയവും, സമകാലിക സംഗീതാഭിരുചികളോട് ചേർന്ന് നിൽക്കുന്ന രീതിയിലും അവതരിപ്പിക്കാനുള്ള ശ്രമമാണ് ഇവർ നടത്തുന്നത്. ഈ രീതിയിൽ ഇവർ അവതരിപ്പിക്കുന്ന സംഗീതപരിപാടിയാണ് വൈറലായി മാറിയത്.
Comments