പ്രഗതി മൈതാനിൽ പണികഴിപ്പിച്ചിരിക്കുന്ന ഇന്റർനാഷണൽ എക്സിബിഷൻ-കം-കൺവെൻഷൻ സെന്റർ (ഐഇസിസി) സമുച്ചയം ഇന്ന് പ്രധാനമന്ത്രി നരേന്ദ്രമോദി ഉദ്ഘാടനം ചെയ്യും. 123 ഏക്കറിൽ 2700 കോടി രൂപ ചെലവിലാണ് കേന്ദ്രസർക്കാർ ഇന്റർനാഷണൽ എക്സിബിഷൻ-കം-കൺവെൻഷൻ ഒരുക്കിയിരിക്കുന്നത്. ലോകത്തിലെ തന്നെ പ്രമുഖ എക്സിബിഷൻ-കൺവെൻഷൻ കോംപ്ലക്സുകളിൽ ഒന്നായിരിക്കുമെന്ന് പിഎംഒ പുറത്തിറക്കിയ പ്രസ്താവനയിൽ പറയുന്നു.
പ്രഗതി മൈതാനത്ത് പുതിയതായി വികസിപ്പിച്ച ഐഇസിസി സമുച്ചയത്തിൽ കൺവെൻഷൻ സെന്റർ, എക്സിബിഷൻ ഹാളുകൾ എന്നിവയ്ക്ക് പുറമേ അത്യാധുനിക തിയേറ്ററുകളും സജ്ജമാക്കിയിട്ടുണ്ട്. ഐഇസിസി സമുച്ചയത്തിൽ ഏഴ് എക്സിബിഷൻ ഹാളുകളാണ് ഒരുക്കിയിരിക്കുന്നത്. രാജ്യത്തിന്റെ വിവിധ പ്രദേശങ്ങളിൽ നിന്നുമുള്ള വിവിധ ചിത്രങ്ങളും ഗോത്ര കലാരൂപങ്ങളും ഉപയോഗിച്ചാണ് കൺവെൻഷൻ സെന്ററിന്റെ അലങ്കാരം. ശംഖിന്റെ ആകൃതിയിലാണ് കെട്ടിടത്തിന്റെ നിർമ്മാണം. വിപുലമായ അന്താരാഷ്ട്ര എക്സിബിഷനുകൾ, വ്യാപാര മേളകൾ, കൺവെൻഷനുകൾ, കോൺഫറൻസുകൾ തുടങ്ങിയവയ്ക്ക് ആതിഥേയത്വം വഹിക്കാനാകുന്ന രീതിയിലാണ് കെട്ടിടത്തിന്റെ നിർമ്മാണം.
