ശ്രീരാമൻ യുവരാജാവായി അഭിഷേകം ചെയ്യപ്പെടണമെന്നാണ് അയോധ്യയിലെ പ്രജകൾ ആഗ്രഹിക്കുന്നത്..
“പൗര ജനങ്ങളും മന്ത്രി മുഖ്യന്മാരും
ശ്രീരാമനെപ്രശംസിക്കുന്നിതെപ്പോഴും
ഓരോ ഗുണഗണം കണ്ടവര്
ക്കുണ്ടകതാരിലാനന്ദമതിനില്ല സംശയം”…
എന്ന് ദശരഥമഹാരാജാവും ഗുരുജനങ്ങളും വിലയിരുത്തി. ശ്രീരാമന്റെ ഗുണഗണങ്ങൾ അറിഞ്ഞവരെല്ലാം ഉള്ളിലാനന്ദത്തിലാണ് എന്ന് ദശരഥനറിയാം. എങ്കിലും കൈകേയിയോട് വിവരം പറയാൻ അല്പം ഭയമാണ്. കേകയത്തിലേക്ക് യുധാജിത്ത് അമ്മാവനെ കാണാൻ പോയ ഭരതനും ശത്രുഘ്നനും തിരിച്ചു വന്നിട്ടില്ല അവർ വരാൻ കാത്തുനിൽക്കുന്നില്ല, നാളെ പൂയം നക്ഷത്രത്തിൽ നല്ല മുഹൂർത്തമുണ്ട് അതിനാൽ നാളെ തന്നെ അഭിഷേകം നടത്തണം.
രാജനിയോഗമനുസരിച്ച് കുലഗുരുവസിഷ്ഠൻ ശ്രീരാമനെ വിവരം ധരിപ്പിക്കാനായി സന്ദർശിച്ചു. സീതാരാമന്മാർ വസിഷ്ഠഗുരുവിനെ കാലുകഴുകി സ്വീകരിച്ചു പാദം കഴുകിയ തീർത്ഥം ശിരസ്സിൽ ധരിച്ചു. ഈ തീർത്ഥ സ്പർശം കൊണ്ട് താൻ പുണ്യവാനായി എന്ന ശ്രീരാമവാക്യം കേട്ടപ്പോൾ വസിഷ്ഠ മഹർഷിക്ക് പലതും ആലോചിക്കാനുണ്ടായിരുന്നു.
ശ്രീരാമന്റെ കാലുകഴുകിയ പാദതീർത്ഥം ശിരസ്സിൽ ധരിക്കുന്നതിന് കിട്ടുന്ന അവസരങ്ങൾ ഒന്നും ശ്രീ പരമേശ്വരൻ പോലും നഷ്ടപ്പെടുത്താറില്ല എന്റെ അച്ഛൻ ബ്രഹ്മ ദേവനും ആ പാദതീർത്ഥത്തിൽ ആനന്ദം കൊള്ളുന്നു. ഇപ്പോൾ ശ്രീരാമന്റെ വാക്കുകൾ ലോകരെ ആചാരങ്ങൾ ഓർമിപ്പിക്കാൻ വേണ്ടി മാത്രമാണ്. ശ്രീരാമൻ രാവണ നിഗ്രഹത്തിന് പ്രാരംഭമായുള്ള വനയാത്ര നാളെ ആരംഭിക്കും എന്നറിയാം. എങ്കിലും അഭിഷേകസംരംഭത്തിന് ഒരുങ്ങിയിരിക്കാൻ മഹാരാജാവ് നിർദേശിച്ചത് ശ്രീരാമനെ അറിയിച്ചു വസിഷ്ഠഗുരു ചുമതല നിറവേറ്റി
എഴുതിയത്
എ പി ജയശങ്കർ
ഫോൺ : 9447213643
ശ്രീ എ പി ജയശങ്കർ എഴുതിയ രാമായണ തത്വ വിചാരത്തിന്റെ മറ്റു ഭാഗങ്ങൾ വായിക്കാൻ ഈ ലിങ്കിൽ ക്ലിക്ക് ചെയ്യുക
https://janamtv.com/tag/ramayana-thatwavicharam/
Comments