‘എൻ മണ്ണ്, എൻ മക്കൾ’; അണ്ണാമലൈ നയിക്കുന്ന പദയാത്രയ്‌ക്ക് ഇന്ന് തുടക്കം കുറിക്കും

ചെന്നൈ: ബിജെപി തമിഴ്‌നാട് സംസ്ഥാന അദ്ധ്യക്ഷൻ അണ്ണാമലൈ നയിക്കുന്ന പദയാത്ര ഇന്ന് ആരംഭിക്കും. കേന്ദ്ര ആഭ്യന്തരമന്ത്രി അമിത് ഷായാണ് പദയാത്ര ഉദ്ഘാടനം ചെയ്യുന്നത്. ഇന്ന് വൈകിട്ട് രമേശ്വരത്ത് നിന്നാണ് യാത്ര ആരംഭിക്കുന്നത്. ‘എൻ മണ്ണ്, എൻ മക്കൾ’ എന്ന മുദ്രാവാക്യം ഉയർത്തിയാണ് യാത്ര.

തമിഴ്നാട്ടിലെ 234 മണ്ഡലങ്ങളിലൂടെ കടന്നുപോകുന്ന യാത്രയിൽ ഓരോയിടത്തും മുതിർന്ന നേതാക്കൾ യാത്രയ്‌ക്ക് നേതൃത്വം നൽകും. അഞ്ച് ഭാഗമായാണ് യാത്ര സംഘടിപ്പിക്കുന്നത്. ഇന്ന് മുതൽ ആഗസ്റ്റ് 22-വരെ നടക്കുന്ന യാത്രയുടെ ആദ്യ ഭാഗം മുൻ കേന്ദ്രമന്ത്രി പൊൻ രാധാകൃഷ്ണനാണ് നേതൃത്വം നൽകുന്നത്. പദയാത്രയിൽ 1,770 കിലോമീറ്ററിലധികം കാൽനടയായും ഗ്രാമപ്രദേശങ്ങൾ ഒഴികെയുള്ള പ്രദേശങ്ങളിൽ വാഹനത്തിലുമാണ് നടക്കുന്നത്. പത്ത് പ്രധാന പൊതുറാലികളെ കേന്ദ്രമന്ത്രിമാർ അഭിസംബോധന ചെയ്യും.

168 ദിവസത്തിനുള്ളിൽ തമിഴ്‌നാട് മുഴുവൻ സഞ്ചരിക്കും. ലോക്സഭാ തിരഞ്ഞെടുപ്പിന് മുന്നോടിയായി നടക്കുന്ന യാത്ര എല്ലാ നിയോജക മണ്ഡലങ്ങളും സഞ്ചരിച്ച് കേന്ദ്രസർക്കാരിന്റെ ഒമ്പത് വർഷത്തെ ഭരണനേട്ടങ്ങളെ കുറിച്ച് ജനങ്ങൾക്ക് മുന്നിൽ അവതരിപ്പിക്കുകയും ഡിഎംകെയുടെ അഴിമതി തുറന്നുകാട്ടുകയും ചെയ്യും. ‘മോദി എന്ത് ചെയ്തു’ എന്ന പുസ്തകം വിതരണം ചെയ്തുകൊണ്ട് രാജ്യത്തിന് വേണ്ടി പ്രധാനമന്ത്രി നടപ്പിലാക്കിയ പദ്ധതികളും, തീരുമാനങ്ങളും ജനങ്ങൾക്ക് മനസിലാക്കി കൊടുക്കുന്നതാണ് യാത്രയുടെ ലക്ഷ്യം.