ഗണപതി ഭഗവാനെ അധിക്ഷേപിച്ച് പരാമർശം നടത്തിയ സ്പീക്കർ ഷംസീറിനെതിരെ പ്രതിഷേധം ശക്തമാകുന്നതിനിടെ പ്രതികരണവുമായി പ്രശസ്ത ഗാനരചയിതാവ് ശ്രീകുമാരൻ തമ്പി. ശാസ്ത്രവും മിത്തുകളും കൂടിക്കലർന്നിട്ടുള്ളത് ഹിന്ദുമതത്തിൽ മാത്രമല്ലെന്നും എല്ലാ മതങ്ങളിലും അത് സംഭവിച്ചിട്ടുണ്ടെന്നും അദ്ദേഹം ഫേസ്ബുക്കിൽ കുറിച്ചു. ഇസ്ലാം മതത്തെപോലെയോ ക്രിസ്തുമതത്തെപോലെയോ ഒരു വ്യക്തി സ്ഥാപിച്ച മതമല്ല ഹിന്ദുമതമെന്നും ഓംകാരത്തിന്റെ പ്രതീകമാണ് ഗണപതി, അതിനാലാണ് ക്ഷേത്രങ്ങളിലെത്തിയാൽ ആദ്യം ഗണപതിയെ വണങ്ങുന്നതെന്നും അദ്ദേഹം കുറിച്ചു. ഗണപതി ഭഗവാനെ അവഹേളിച്ച വിഷയത്തിൽ ഷംസീറിനെതിരെ ഹിന്ദു സംഘടനകൾ രംഗത്തുവന്ന സാഹചര്യത്തിലാണ് ശ്രീകുമാരൻ തമ്പിയുടെ ഫേസ്ബുക്ക് കുറിപ്പ് എന്നതാണ് ശ്രദ്ധേയം.
കുറിപ്പിന്റെ പൂർണരൂപം:
എന്റെ സുഹൃത്ത് റസൂൽ പൂക്കുട്ടി മികച്ച ശബ്ദലേഖകനുള്ള ഓസ്കാർ അവാർഡ് വാങ്ങുന്നതിനു മുമ്പു പറഞ്ഞ ഒരു വാചകമുണ്ട്.
‘ ഞാൻ ഓംകാരത്തിന്റെ നാട്ടിൽ നിന്നാണ് വരുന്നത്.’
പ്രപഞ്ചം ഉണ്ടായത് നാദത്തിൽ നിന്നാണെന്നു ഭാരതീയസംസ്കാരം പറയുന്നു. ഭൗതികശാസ്ത്രം പറയുന്നത് ‘ഒരു മഹാവിസ്ഫോടനത്തിൽ നിന്ന് പ്രപഞ്ചമുണ്ടായി ‘ എന്നാണ്. ( BIG BANG THEORY ). ഓംകാരത്തിന്റെ ( ആദ്യമുണ്ടായ നാദ ബിന്ദുവിന്റെ) പ്രതീകമാണ് ഗണപതി. അതുകൊണ്ടാണ് ഏതു ക്ഷേത്രത്തിൽ പോയാലും ആദ്യം നാം ഗണപതിയെ വന്ദിക്കണം എന്നു പറയുന്നത്. ശാസ്ത്രവും മിത്തുകളും കൂടിക്കലർന്നിട്ടുള്ളത് ഹിന്ദുമതത്തിൽ മാത്രമല്ല. എല്ലാ മതങ്ങളിലും അത് സംഭവിച്ചിട്ടുണ്ട്. ഇസ്ലാം മതത്തെപോലെയോ ക്രിസ്തുമതത്തെപോലെയോ ഒരു വ്യക്തി സ്ഥാപിച്ച മതമല്ല ഹിന്ദുമതം. സിന്ധുനദീതീരത്തു താമസിച്ചിരുന്ന സംസ്കാരസമ്പന്നരായ ഒരു ജനതയുടെ ജീവിതരീതി ഒരു മതമായി മാറിയതാണ്. ഭഗവദ്ഗീത മാത്രമല്ല ബൈബിളും ഖുർആനും മനസ്സിരുത്തി പഠിച്ചിട്ടുള്ളവനാണ് ഞാൻ. അതുകൊണ്ടാണ് ‘കാൽവരിയിൽ പൂത്തുലഞ്ഞ രക്തപുഷ്പമേ …’ എന്നും ‘ പച്ചയാം മരത്തിൽ പോലും തീ നിറയ്ക്കും അല്ലാഹു ‘ എന്നും എഴുതാൻ എനിക്ക് കഴിയുന്നത്.
