ഗണേശോത്സവത്തിൽ പങ്കെടുക്കുമെന്നറിയിച്ച് നടൻ ഉണ്ണി മുകുന്ദൻ. പാലക്കാട് ഒറ്റപ്പാലത്ത് ഓഗസ്റ്റ് 22-ന് സംഘടിപ്പിക്കുന്ന ചടങ്ങിലാണ് നടൻ പങ്കെടുക്കുന്നത്. വൈകുന്നേരം നാല് മണിയ്ക്കാണ് പരിപാടി. നടൻ തന്റെ ഫേസ്ബുക്കിലൂടെയാണ് ഇക്കാര്യം അറിയിച്ചത്.
കാത്തിരിക്കുകയാണ് 2023-ലെ ഗണേശോത്സവത്തിനായി എന്ന തലക്കെട്ടോടെയാണ് താരം ചിത്രം പങ്കുവെച്ചത്. ‘ഞാനുണ്ട് ഉത്സവത്തിന് കൂടെയുണ്ടാവണം’ എന്നും പോസ്റ്ററിൽ പറയുന്നു. പോസ്റ്റ് പങ്കുവെച്ച് നിമിഷ നേരം കൊണ്ടുതന്നെ ഗണേശോത്സവത്തിൽ പങ്കെടുക്കുമെന്ന് ആരാധകരും അറിയിച്ചു.
ഇത്തവണ ഏറെ പ്രത്യേകതകൾ നിറഞ്ഞതാകും ഗണേശോത്സവം. മൂന്നടി മുതൽ ആറടി വരെയുള്ള ഗണേശ വിഗ്രഹങ്ങളാകും ഇത്തവണ ഉപയോഗിക്കുക. സംസ്ഥാനത്തിന്റെ വിവിധ കേന്ദ്രങ്ങളിലേക്കുള്ള മുന്നൂറോളം ഗണേശവിഗ്രഹങ്ങൾ പാലക്കാടാണ് ഒരുങ്ങുന്നത്. 14 അടിയോളമുള്ള മള്ളിയൂർ മഹാഗണപതിയാണ് അതിൽ പ്രത്യേകത നിറഞ്ഞത്. പോണ്ടിച്ചേരിയിൽ നിന്നാണ് പേപ്പർ പൾപ്പുകൊണ്ടുള്ള ഗണപതി വിഗ്രഹത്തിന്റെ ഭാഗങ്ങളെത്തുന്നത്. പത്തിന് വ്രതകാപ്പ് ചടങ്ങോടെയാണ് ഗണേശോത്സവം തുടങ്ങുക. 20-നാണ് വിനായക ചതുർത്ഥി. 21-നാണ് നിമജ്ജന മഹാശോഭയാത്രകൾ.
