ജോലിക്ക് വേണ്ടി മാത്രമല്ല, മറ്റ് പല കാര്യങ്ങൾക്കു വേണ്ടിയും നമ്മൾ ബയോഡാറ്റ , സിവി അല്ലെങ്കിൽ റെസ്യൂമെ തയ്യാറാക്കിയിട്ടുണ്ട്. എന്നാൽ വിചിത്രമെന്ന് പറയട്ടെ നമ്മളിൽ ബഹുഭൂരിപക്ഷത്തിനും ബയോഡാറ്റയും സിവിയും റെസ്യൂമെയും തമ്മിലുള്ള വ്യത്യാസങ്ങൾ കൃത്യമായി അറിയില്ല.
നിങ്ങളുടെ ബയോഡാറ്റ/സിവി/റെസ്യൂമെ കണ്ടാൽ മാത്രം മതിയാകും നിങ്ങളുടെ നിലവാരം അറിയാൻ.
ബയോഡാറ്റ/സിവി/റെസ്യൂമെ – അവ പരസ്പരം മാറാവുന്നവയാണെന്ന് തോന്നുന്നു, അല്ലേ? എന്നാൽ അങ്ങനെയല്ല. ഈ പദങ്ങൾ മൂന്ന് വ്യത്യസ്ത ഉള്ളടക്കമുള്ള രേഖകളെ ആണ് സൂചിപ്പിക്കുന്നത്. അവയ്ക്ക് ഓരോന്നിനും അതിന്റേതായ സവിശേഷതകളും ഉപയോഗിക്കേണ്ടുന്ന ഉചിതമായ സന്ദർഭങ്ങളുമുണ്ട്. അതിനാൽ, അവയുടെ വ്യത്യാസങ്ങളെക്കുറിച്ച് കൂടുതൽ മനസ്സിലാക്കാൻ അവയെ വിശകലനം ചെയ്ത് ഓരോന്നിനെയും എപ്പോൾ ഉപയോഗിക്കണമെന്ന് മനസിലാക്കാം.
ആദ്യം, Curriculum Vitae അല്ലെങ്കിൽ CV യെക്കുറിച്ച് പറയാം
ലത്തീൻ ഭാഷയിൽ നിന്നും ‘ജീവിതപരിചയം’ എന്നർഥം വരുന്ന വാക്ക് ആണ് കരിക്കുലം വിറ്റെ എന്ന സിവി.
ഈ രേഖ ഒരു സമഗ്രമായ കരിയർ ജീവചരിത്രത്തിന് സമാനമാണ്. ഇത് നിങ്ങളുടെ പ്രൊഫഷണൽ ജീവിതത്തിലെ ഓരോ വിശദാംശങ്ങളും ഉൾക്കൊണ്ട് നിർമിക്കേണ്ട ഒന്നാകുന്നു. ഇതിൽ നിങ്ങളുടെ അക്കാദമിക്, തൊഴിൽ, ഗവേഷണ, അധ്യാപന അനുഭവങ്ങൾ വളരെ വിശാലമായി പ്രകടിപ്പിക്കണം. കൂടാതെ, നിങ്ങളുടെ പ്രസിദ്ധീകരണങ്ങൾ, അവതരണങ്ങൾ, ബഹുമതികൾ, അവാർഡുകൾ, അഫിലിയേഷനുകൾ എന്നിവയെക്കുറിച്ചുള്ള വിവരങ്ങൾ ഉൾക്കൊള്ളിച്ചിരിക്കണം. വളരെ സമഗ്രമായി തയാറാകുന്ന സിവിയിൽ പേജുകൾക്കു നിയന്ത്രണം ഇല്ല. ഓരോരുത്തരുടെയും ജീവിതത്തിലെ സംഭവ ബാഹുല്യത്തിന്റെ അടിസ്ഥാനത്തിൽ എത്ര പേജ് വേണമെങ്കിലുമാകാം. കൂടുതലായും അക്കാദമിക്, വിദ്യാഭ്യാസ, ശാസ്ത്രീയ, ഗവേഷണ മേഖലകളിലാണ് സിവി ഉപയോഗിക്കുന്നത്. അല്ലെങ്കിൽ ഒരു സ്ഥാപനത്തിന്റെ വളരെ ഉയർന്ന ഉദ്യോഗത്തിനു ശ്രമിക്കുമ്പോൾ, ചിലപ്പോൾ വിസ ആവശ്യത്തിന് ഒക്കെ ആണ് പൊതുവിൽ സിവി വേണ്ടി വരുന്നത്.
ഇനി റെസ്യൂമെ എന്തെന്ന് നോക്കാം
ഒരു മെഗാ സീരിയൽ ആണ് സിവി എങ്കിൽ അതേ കഥയിൽ ഉള്ള ഒരു ഷോർട് ഫിലിമാണ് റെസ്യുമെ. അതായത് വളരെ അടിസ്ഥാനപരമായ കാര്യങ്ങൾ മാത്രം ഉൾകൊള്ളിക്കുന്ന ഒരു കരിയർ രേഖ. ഇതിൽ നിങ്ങളുടെ വിദ്യാഭ്യാസ, കരിയർ, യോഗ്യതകൾ തുടങ്ങിയവയുടെ സംക്ഷിപ്തമായ വിവരണം മാത്രമേ നൽകാവൂ. ഒന്ന് അല്ലെങ്കിൽ കൂടിയാൽ രണ്ടു പേജിൽ നിർത്തണം നിങ്ങളുടെ റെസ്യുമെ. തൊഴിൽ ആവശ്യത്തിന് വേണ്ടി ആണ് ഈ രേഖ പ്രധാനമായും ഉപയോഗിക്കുന്നത്. ഏതു തൊഴിലിനു ആണോ അപേക്ഷിക്കുന്നത് അതിനു വേണ്ടി കാര്യമാത്ര പ്രസക്തമായ കാര്യങ്ങൾ ഉൾകൊള്ളിച്ചു, കുറിക്കു കൊള്ളുന്ന രീതിയിൽ വേണം ഒരു റെസ്യുമെ നിർമ്മിക്കേണ്ടത്.
ബയോഡാറ്റ എന്തെന്ന് നോക്കാം
വാസ്തവത്തിൽ ബയോ ഡാറ്റാ എന്നാൽ ജീവിതവും ആയി ബന്ധപ്പെട്ട കാര്യങ്ങൾ എന്നാണ് പറയുന്നത്. ഒരു വിവാഹം ആലോചിക്കുമ്പോൾ എന്തൊക്കെയാണോ നിങ്ങൾ പറയാൻ ആഗ്രഹിക്കുന്നത് അത് പോലെ വളരെ വ്യക്തിപരമായ വിശദാംശങ്ങൾ നൽകുന്ന ഒരു രേഖയാണ് ബയോ ഡാറ്റ. ഇതിൽ നിങ്ങളുടെ പ്രായം, മതം, കുടുംബസ്ഥനാണോ അല്ലയോ, മാതാപിതാക്കളുടെ പേര് തുടങ്ങി ശാരീരിക വിശദാംശങ്ങൾ ആയ ഉയരം, തൂക്കം പോലെയുള്ള കാര്യങ്ങൾ വേണമെങ്കിലും ഉൾപ്പെടുത്താം. തെക്കൻ ഏഷ്യയിൽ മാത്രം ബയോ ഡാറ്റ എന്ന വാക്ക് റെസ്യുമെ എന്നതിന് പകരം ഉപയോഗിച്ച് കാണുന്നു. എന്നാൽ പാശ്ചാത്യ തൊഴിൽ മേഖലകളിൽ ബയോഡാറ്റാ എന്ന പ്രയോഗം സാധാരണമല്ല. ഇന്ത്യയിൽ പരമ്പരാഗതമായി വിവാഹാലോചനകൾ, സർക്കാർ അപേക്ഷകൾ അല്ലെങ്കിൽ വ്യക്തിയുടെ വ്യക്തിപരമായ പശ്ചാത്തലം പ്രധാനമാണ് എന്നിടങ്ങളിൽ ഇതു ഉപയോഗിക്കുന്നു.
ഓരോ രേഖയും ചില സാധാരണ ഘടകങ്ങൾ പങ്കിടുന്നുവെങ്കിലും, പ്രധാന വ്യത്യാസങ്ങൾ അവയുടെ ഉള്ളടക്കം, ദൈർഘ്യം, ഉദ്ദേശ്യം, സാംസ്കാരിക സന്ദർഭം എന്നിവയിലാണ്. CV അക്കാദമിക മേഖലയ്ക്കുള്ള വിശദമായ, എല്ലാം ഉൾക്കൊള്ളുന്ന ചരിത്രമാണ്. റെസ്യുമെ കോർപറേറ്റ് ലോകത്തിനായുള്ള ഹ്രസ്വവും ലക്ഷ്യബോധമുള്ളതുമായ കരിയർ സ്നാപ്പ്ഷോട്ട് ആണ്. ബയോഡാറ്റ എന്നത് ഒരു വ്യക്തിയുടെ വ്യക്തിപരമായ പശ്ചാത്തലം മനസ്സിലാക്കാൻ സഹായിക്കുന്ന വ്യക്തിഗത പ്രൊഫൈലാണ്, പലപ്പോഴും നിർദ്ദിഷ്ട സാംസ്കാരിക അല്ലെങ്കിൽ സർക്കാർ സന്ദർഭങ്ങളിൽ ഉപയോഗിക്കുന്നു.
ഈ മൂന്നു രേഖകളുടെയും പ്രധാന വ്യത്യാസങ്ങൾ മനസ്സിലാക്കുന്നത് നിങ്ങളുടെ കരിയർ യാത്രയിൽ നിർണായക പങ്ക് വഹിക്കാം. ഇന്നത്തെ മത്സരാധിഷ്ഠിത തൊഴിൽ മേഖലയിൽ, ഏത് രേഖ, എപ്പോൾ ഉപയോഗിക്കണം എന്ന് അറിഞ്ഞിരുന്നാൽ, നിങ്ങളുടെ കരിയർ മുന്നേറുന്നതിന് ഉപയോഗപ്പെടുത്താം. നിങ്ങളുടെ ഉദ്ദേശ്യത്തിന് അനുസൃതമായി നിങ്ങളുടെ ഈ കരിയർ രേഖ നിർമിക്കുന്നത് നിങ്ങളുടെ സമയവും ഊർജ്ജവും ലാഭിക്കുക മാത്രമല്ല, നിങ്ങളെ ജനക്കൂട്ടത്തിൽ നിന്ന് വേറിട്ടുനിർത്തുകയും ചെയ്യും.
അവസാനമായി, ഓരോ രേഖയും നിങ്ങളുടെ കരിയർ ടൂൾകിറ്റിലെ ഒരു പ്രത്യേക ഉപകരണമാണ്. നന്നായി തയ്യാറാക്കിയ സിവി, റെസ്യുമെ അല്ലെങ്കിൽ ബയോഡാറ്റ നിങ്ങളുടെ കരിയറിലെ അടുത്ത ചവിട്ടു പടിയാണ്. നിങ്ങളുടെ ഈ ഡോക്യുമെന്റ് പ്രൊഫഷണലായതും ഉദ്ദേശ്യപൂർവ്വം രൂപകൽപ്പന ചെയ്തതുമാണെന്ന് എല്ലായ്പ്പോഴും ഉറപ്പാക്കുക. എല്ലാത്തിനുമുപരി, ഇത് ഒരു ജോലിയിൽ നിങ്ങളെ ഇരുത്തുന്നതിനല്ല, ഇത് നിങ്ങളുടെ ജീവിതം നിങ്ങൾ ആഗ്രഹിക്കുന്ന ദിശയിലേക്ക് നയിക്കുന്നതിനാണ്.
(അടുത്ത ഭാഗം: ഓൺലൈൻ റെസ്യുമെ നിർമിച്ചാൽ നന്നായിരിക്കുമോ?)
തയ്യാറാക്കിയത്
പ്രിയാ പ്രഭാകർ
Phone +91 9995000885
