കണ്ണിന് ചുറ്റുമുള്ള കറുപ്പ് നിറം സ്ത്രീകളെ എപ്പോഴും അലട്ടുന്ന പ്രശ്നങ്ങളിൽ ഒന്നാണ്. പല കാരണങ്ങൾ കൊണ്ടും കണ്ണിന് ചുറ്റും കറുപ്പു നിറം വരാം. ഉറക്ക കുറവ്, പോഷകാഹാര കുറവ്, സമ്മർദ്ദം എന്നിവയൊക്കെ ഇതിന് കാരണമാവാറുണ്ട്. കൂടാതെ സൂര്യ കിരണങ്ങളോ, കമ്പ്യൂട്ടർ, ടിവി, മൊബൈൽ സ്ക്രീൻ തുടർച്ചയായി നോക്കുന്നതോ ഇതിന് കാരണമാകാറുണ്ട്. പ്രായമാകുന്നതിനനുസരിച്ച് ശരീരത്തിൽ സംഭവിക്കുന്ന ജനിതകമാറ്റങ്ങൾ കാരണവും കറുപ്പ് നിറം ഉണ്ടാകാം.
കണ്ണിന് ചുറ്റുമുള്ള ചർമ്മം വളരെ നേർത്തതും ലോലവുമാണ്. മുഖത്തിന്റെ ബാക്കി ഭാഗങ്ങളുമായി താരതമ്യപ്പെടുത്തുമ്പോൾ ഇവിടെ എണ്ണ ഗ്രന്ഥികൾ കുറവാണ്. പ്രായമാകുന്നതിന് അനുസരിച്ച് ചർമ്മത്തിന്റെ കൊളോജനും എലാസ്റ്റിനും നഷ്ടപ്പെടുന്നു. ഇതുവഴി കൺതടത്തിലെ ചർമ്മം വരളുന്നതിനും ചുളിവുകൾ വീഴുന്നതിനും കാരണമാകുന്നു. ഇത് പരിഹരിക്കാനായി വീട്ടിൽ തന്നെ ചില പൊടിക്കൈകൾ ശ്രദ്ധിച്ചാൽ മതി. കണ്ണിലെ കറുപ്പ് പാടെ അകറ്റാൻ നമുക്ക് സാധിക്കും.
കൺത്തടങ്ങൾ തടിച്ചുവരുന്നത് തടയാൻ മികച്ച പരിഹാര മാർഗമാണ് ഉരുളക്കിഴങ്ങ്. ആസ്ട്രിജെന്റ് എൻസൈമുകൾ ഉരുളക്കിഴങ്ങിൽ അടങ്ങിയിട്ടുള്ളതിനാൽ ഇത് മികച്ച റിസൾട്ടാണ് തരുക. ഉരുളക്കിഴങ്ങ് കഷ്ണങ്ങളാക്കി മുറിച്ച് ഇത് ദിവസേന കണ്ണിന് ചുറ്റും പുരട്ടി കൊടുക്കുകയാണെങ്കിൽ കണ്ണിന് ചുറ്റുമുള്ള കറുപ്പ് ഇല്ലാതാക്കാൻ സഹായിക്കുന്നതായിരിക്കും.
തണുത്ത കട്ടൻ ചായ പഞ്ഞിയിൽ മുക്കി കണ്ണിന് മുകളിൽ വെയ്ക്കുന്നതും മറ്റൊരു തരത്തിൽ കണ്ണിന് ഗുണം ചെയ്യും. 10 മിനിറ്റ് വെച്ചതിന് ശേഷം തണുത്ത വെള്ളത്തിൽ കഴുകി കളയുക. അതുപോലെ വെള്ളരിയ്ക്ക നീരും കണ്ണിന് ഗുണം ചെയ്യുന്നതാണ്.
കണ്ണ് ഇളം ചൂട് വെള്ളത്തിൽ കഴുകിയ ശേഷം തണുത്ത വെള്ളം കൊണ്ട് കഴുകുക. ഇതിലൂടെ കണ്ണിലെ ക്ഷീണം മാറി ഉഷാറാകും. ഇത് കണ്ണിന്റെ ആരോഗ്യത്തിന് ഗുണകരമാണ്.
തക്കാളിനീര് കൺപോളകൾക്ക് മുകളിൽ പുരട്ടിയ ശേഷം കഴുകി കളയുന്നതും കൺതടത്തിലെ കറുപ്പ് നിറമകറ്റും. ലൈക്കോപീൻ തക്കാളിയിൽ അടങ്ങിയിരിക്കുന്നതിനാലാണ് ചർമ്മത്തെ മൃദുവായി സൂക്ഷിക്കാൻ ഈ പരീക്ഷണം സഹായിക്കുന്നത്.
ഇടയ്ക്കിടയ്ക്ക് കണ്ണ് കഴുകുന്നത്് കണ്ണിലെ പൊടിപടലങ്ങൾ ഇല്ലാതാക്കുന്നതിന് സഹായിക്കുന്നു. തണുത്ത വെള്ളത്തിൽ കണ്ണ് കഴുകുകയാണെങ്കിൽ കൂടുതൽ പ്രയോജനകരമാകും.
വെള്ളരിയ്ക്കാ നീര്, ഉരുളക്കിഴങ്ങ് നീര്, നാരങ്ങാനീര് എന്നിവ ചേർത്ത് കണ്ണിൽ പുരട്ടി 20 മിനിറ്റിന് ശേഷം കഴുകി കളയുക. ഇത് ദിവസേന ചെയ്യുകയാണെങ്കിൽ കണ്ണിന് ചുറ്റുമുള്ള കറുപ്പ് വേഗത്തിൽ മാറുന്നതിന് സഹായിക്കും.
Comments