താടി നീട്ടി വളർത്താൻ നമുക്ക് എല്ലാവർക്കും ഇഷ്ടമാണ്. എന്നാൽ താടി നീട്ടി വളർത്തുന്നവരിൽ വളരെ സാധാരണയായി കണ്ടുവരുന്ന ഒന്നാണ് താരൻ. വൃത്തിക്കുറവ്, വരണ്ട ചർമം ഫംഗസ് അണുബാധ എന്നിവയാണ് താടിയിൽ താരൻ ഉണ്ടാകുന്നതിന്റെ പ്രധാന കാരണങ്ങൾ. താടിക്ക് കീഴിലുള്ള ചർമ്മം കഠിനമായ ക്ലെൻസറുകളോ സാധാരണ സോപ്പുകളോ ഉപയോഗിക്കുന്നത് മൂലം വരണ്ടു പോയേക്കാം. ഈ ഉത്പന്നങ്ങൾ മൂലം ചർമ്മത്തിൽ നിന്നോ താടി രോമത്തിൽ നിന്നോ പ്രകൃതിദത്ത എണ്ണകൾ വലിച്ചെടുത്ത് വരണ്ടതാക്കുന്നു. അതുപോലെ തണുത്ത കാലാവസ്ഥയും വരണ്ട ചർമ്മത്തിന് കാരണമാകും. താടിയിലെ താരൻ അകറ്റുന്നതിന് ഇതാ ചില പരിഹാരങ്ങൾ…
ഷാംപൂ ഉപയോഗിച്ച് ഇടയ്ക്കിടെ താടി കഴുകുന്നത് താരൻ ഇല്ലാതാക്കും. അതുപോലെ പ്രകൃതിദത്ത സോപ്പുകളോ ഫേഷ്യൽ ക്ലെൻസറുകളോ ഉപയോഗിച്ച് മുഖവും താടിയും പതിവായി കഴുകുക. വീര്യം കൂടിയ ക്ലെൻസറുകൾ ഉപയോഗിക്കുന്നത് ഒഴിവാക്കുക. കാരണം അവ ചർമ്മത്തെ വീണ്ടും വരണ്ടതാക്കും.
ടീട്രീ ഓയിൽ, വെളിച്ചെണ്ണ, ജോജോബ ഓയിൽ എന്നിവ താരൻ അകറ്റുന്നതിന് സഹായിക്കുന്നവയാണ്. ഒലിവ് എണ്ണ, അവക്കാഡോ എണ്ണ, ബദാം ഓയിൽ പോലുള്ള എണ്ണകൾ ഒഴിവാക്കണം. ഇവ ചർമ്മത്തിലെ സംരക്ഷണ പാളിയെ തകരാറിലാക്കുകയും അലർജിക്ക് കാരണമാവുകയും ചെയ്യും.
താടി കഴുകുന്ന സമയത്ത് നഖം കൊണ്ട് ചൊറിയുന്നത് ഒഴിവാക്കേണ്ടത് അത്യാവശ്യമാണ്. ഇത് മൂലം താരൻ അടരുന്നതിന് കാരണമാകും. മുഖം കഴുകുമ്പോൾ ഒരേ സമയം മുഖം വൃത്തിയാക്കാനും നനയ്ക്കാനും കഴിയുന്ന ഉയർന്ന നിലവാരമുള്ള ഫേഷ്യൽ ക്ലെൻസർ തിരഞ്ഞെടുക്കുക. താടിയുടെ അടിയിൽ ബ്രഷ് ഉപയോഗിച്ച് നിർജ്ജീവ ചർമ്മത്തെ പതിവായി പുറംതള്ളുക. താടിയിൽ നിന്ന് യീസ്റ്റ് അല്ലെങ്കിൽ മറ്റ് ഫംഗസുകളെയും നീക്കം ചെയ്യാൻ ഇത് സഹായിക്കും.
