സാൽവദോർ: ബ്രസീലിയൻ ഫുട്ബോൾ താരം പരിശീലനത്തിനിടെ കുഴഞ്ഞുവീണ് മരിച്ചു. ഡിയോൺ എന്നപേരിലറിയപ്പെടുന്ന ഹോസെ ആൽഡിയാൻ ഒലിവെയ്റ നെറ്റോയാണ് മരിച്ചത്. ഹൃദയാഘാതം മൂലമാണ് മരണം സംഭവിച്ചതെന്ന് ബ്രസീൽ ഫുട്ബോൾ ഫെഡറേഷൻ ഔദ്യോഗികമായി സ്ഥിരീകരിച്ചു.
ബഹിയ ഡെ ഫെയ്റ എന്ന ഫുട്ബോൾ ക്ലബ്ബിന്റെ മുന്നേറ്റ താരമായ ഡിയോൺ ബുധനാഴ്ച്ച ഉച്ചയ്ക്ക് ശേഷം നടന്ന ഫുട്ബോൾ പരിശീലനത്തിനിടെയാണ് കുഴഞ്ഞുവീണത്. സാൽവദോറിൽ നിന്ന് 100 കിലോമീറ്റർ അകലെയുള്ള ഫെയ്റ ഡെ സന്റാനയിലാണ് പരിശീലനം നടന്നത്.
36 കാരനായ ഡിയോണിനെ ടീം ഡോക്ടർ പരിശോധിച്ചെങ്കിലും ജീവൻ രക്ഷിക്കാനായില്ല. 2023-ൽ ടീമിനായി 23 മത്സരം കളിച്ച താരം അഞ്ച് ഗോളും ഒരു അസിസ്റ്റും നേടി. ശനിയാഴ്ച താരം അവസാനമായി ബൂട്ടുകെട്ടിയ മത്സരത്തിൽ ബഹിയ ഡെ ഫെയ്റ വിജയിക്കുകയും ചെയ്തു.
