കർശന നിയമവും അതിവേഗ വിചാരണയും; നിയമസംഹിത മാറ്റങ്ങൾ; ബില്ലുകൾ നിയമമായാൽ…

പേരിൽ ഭാരതീയത, നിയമങ്ങൾക്ക് കടുപ്പം, നിയമനടത്തിപ്പിന് ഗതിവേഗം, നടപടിക്രമങ്ങളിൽ ആധുനിക വത്കരണം എന്നിവയാണ് ചുരുക്കി പറഞ്ഞാൽ നിയമസംഹിത മാറ്റങ്ങൾ.

മാറ്റങ്ങൾ ഒറ്റനോട്ടത്തിൽ

ഐപിസി:– 511 വകുപ്പുകളുള്ളത് ഭാരതീയ ന്യായ സംഹിതയിൽ 356 ആക്കി ചുരുക്കി. 175 വകുപ്പുകളിൽ ഭേദഗതി വരുത്തി. എട്ട് പുതിയ വകുപ്പുകൾ ചേർത്തു.

സിആർപിസി:- 478 വകുപ്പുകളിൽ നിന്ന് ഭാരതീയ നാഗരിക സുരക്ഷാ സംഹിതയിൽ 533 വകുപ്പുകളായി വർദ്ധിപ്പിച്ചു. 160 എണ്ണത്തിൽ ഭേദഗതി. പുതുതായി ഒരു വകുപ്പ് ചേർത്തു. അഞ്ച് വകുപ്പുകൾ പൂർണമായും ഒഴിവാക്കി.

തെളിവ് നിയമം:- 167 വകുപ്പുകളിൽ നിന്ന് ഭാരതീയ സാക്ഷ്യ അധിനിയമത്തിൽ 170 വകുപ്പുകളായി വർദ്ധിച്ചു. 23 എണ്ണത്തിൽ ഭേദഗതി. പുതുതായി ഒരു വകുപ്പ് കൂട്ടിച്ചേർത്തു. അഞ്ച് വകുപ്പുകൾ പൂർണമായും ഒഴിവാക്കി.

ബ്രിട്ടീഷ് പ്രയോഗങ്ങൾ പുറത്ത്

ചട്ടങ്ങളിൽ ബ്രിട്ടീഷ് ഭരണാകാലവുമായി ബന്ധപ്പെട്ട പാർലമെന്റ് ഓഫ് ദി യുണൈറ്റഡ് കിംഗ്ഡം, പ്രൊവിൻഷ്യൽ ആക്ട്, ലണ്ടൻ ഗസ്റ്റ്, ജൂറി, ബാരിസ്റ്റർ, ലഹോർ, കോമൺ വെൽത്ത്, യുണെറ്റഡ് കിംഗ്ഡം ഓഫ് ഗ്രേറ്റ് ബ്രിട്ടൺ ആന്റ് അയർലൻഡ്, ഹെർ മെജസ്റ്റീസ് ഗവൺമെന്റ്, പൊസഷൻ ഓഫ് ബ്രിട്ടീഷ് ക്രൗൺ, കോർട്ട് ഓഫ് ജസ്റ്റിസ് ഇൻ ഇംഗ്ലണ്ട്, ഹെർ മെജസ്റ്റീസ് ഡൊമീനിയൻസ് എന്നീ വാക്കുകൾ എല്ലായിടത്ത് നിന്നും ഒഴിവാക്കി.

ഭാരതീയ ന്യായ സംഹിത ബില്ലിലെ വകുപ്പുകളും ശിക്ഷയും

69-ാം വകുപ്പ്
വിവാഹവാഗ്ദാനം നൽകി ലൈംഗിക ബന്ധത്തിലേർപ്പെട്ട ശേഷമുള്ള വഞ്ചന. ഇത്തരം ലൈംഗികബന്ധം പീഡനക്കുറ്റത്തിന്റെ പരിധിയിൽ വരില്ലെങ്കിലും പത്ത് വർഷം വരെ തടവുശിക്ഷയും പിഴയും ലഭിക്കാം. ജാമ്യമില്ലാ കുറ്റം. സെഷൻസ് കോടതിയിൽ വിചാരണ
70-ാം വകുപ്പ്
കൂട്ടപീഡനം. ജീവപര്യന്തമോ 20 വർഷത്തിൽ കുറയാത്ത കഠിന തടവും പിഴയുമോ ലഭിക്കാവുന്ന കുറ്റം. വിചാരണ സെഷൻസ് കോടതിയിൽ.
70 (2)
പ്രായപൂർത്തിയാകാത്ത പെൺകുട്ടികളെ കൂട്ടപീഡനത്തിരയാക്കുക. വധശിക്ഷയോ ഇളവ് ലഭിക്കാത്ത ജീവപര്യന്തം തടവും പിഴയുമോ ലഭിക്കും. വിചാരണ സെഷൻസ് കോടതിയിൽ
71-ാം വകുപ്പ്
കൂട്ടപീഡനം ആവർത്തിക്കുന്നത്. വധശിക്ഷയോ ഇളവ് അനുവദിക്കാതെ ജീവപര്യന്തം തടവു ശിക്ഷയോ ലഭിക്കാം

102-ാം വകുപ്പ്
ആൾക്കൂട്ട ആക്രമണം. അഞ്ചോ അതിലധികമോ ആളുകൾ ചേർന്ന് വർഗം, ജാതി, സമുദായം, ലിംഗം, ജന്മദേശം,ഭാഷ, വിശ്വാസം തുടങ്ങിയവയുടെ പേരിൽ കൊലക്കുറ്റം ചെയ്യുന്നത്. വധശിക്ഷയോ ജീവപര്യന്തമോ അല്ലെങ്കിൽ ഏഴ് വർഷം വരെ തടവോ ശിക്ഷയായി ലഭിക്കാം. പിഴയും നൽകണം.

109-ാം വകുപ്പ്
സംഘടിത കുറ്റകൃത്യത്തിൽ ഏർപ്പെടുന്നതോ ഇതിന് ശ്രമിക്കുന്നതോ ഒരാളുടെ മരണത്തിനിടയാക്കിയാൽ വധശിക്ഷയോ ജീവപര്യന്തമോ ആണ് ശിക്ഷ ലഭിക്കുക. പത്ത് ലക്ഷത്തിൽ കുറയാത്ത പിഴയും ലഭിക്കും. വിചാരണ സെഷൻസ് കോടതിയിൽ. സംഘടിത കുറ്റകൃത്യം ആസൂത്രണം ചെയ്യുന്നതിന് അഞ്ച് വർഷം മുതൽ ജീവപര്യന്തം വരെ തടവുശിക്ഷ. അഞ്ച് ലക്ഷം രൂപയിൽ കുറയാതെ പിഴയും ലഭിക്കും.
110-ാം വകുപ്പ്
നിസാര സ്വഭാവത്തോടെയുള്ള സംഘടിത കുറ്റകൃത്യം. പൊതുവിലുള്ള സംഘടിത കുറ്റകൃത്യമെന്നും വിശേഷിപ്പിക്കാം. ഒരു വർഷം മുതൽ ഏഴ് വർഷം വരെ തടവു ശിക്ഷ ലഭിക്കാം. വിചാരണ മജിസ്‌ട്രേറ്റ് കോടതിയിൽ
111-ാം വകുപ്പ്
തീവ്രവാദവുമായി ബന്ധപ്പെട്ട കുറ്റങ്ങൾ. ഒരാളുടെ മരണത്തിനിടയാക്കിയാൽ വധശിക്ഷയോ പരോൾ ഇല്ലാത്ത ജീവപര്യന്തം തടവോ ശിക്ഷ. പത്ത് ലക്ഷം രൂപ വരെ പിഴയും ലഭിക്കും. മറ്റ് സാഹചര്യങ്ങളിൽ അഞ്ച് വർഷം മുതൽ ജീവപര്യന്തം വരെ തടവ്. അഞ്ച് ലക്ഷത്തിൽ കുറയാത്ത പിഴയുമുണ്ട്.

150-ാം വകുപ്പ്
രാജ്യത്തിന്റെ പരമാധികാരവും ഐക്യവും അഖണ്ഡതയും തകർക്കുന്ന പ്രവർത്തനങ്ങൾ. ഏഴ് വർഷം മുതൽ ജീവപര്യന്തം വരെ തടവ്. വിചാരണ സെഷൻസ് കോടതിയിൽ.
302-ാം വകുപ്പ്
പിടിച്ചു പറിക്കൽ. മൂന്ന് വർഷം വരെ തടവുശിക്ഷയും പിഴയും. വിചാരണ മജിസ്‌ട്രേറ്റ് കോടതിയിൽ

ബില്ലുകൾ നിയമമായാൽ

1) വധശിക്ഷാ ഇളവ് ജീവപര്യന്തം തടവിൽ താഴെ ആകാൻ പാടില്ല. വധശിക്ഷയ്‌ക്ക് വിധിക്കപ്പെട്ടയാൾക്ക് ഇളവ് നൽകിയാൽ ജീവപര്യന്തം തടവ് അനുഭവിക്കേണ്ടി വരും. ജീവപര്യന്തത്തിന് നൽകാവുന്ന ഇളവ് ഏഴ് വർഷത്തിൽ താഴെയാകരുത്.
2) സിവിൽ സർവീസ് ഉദ്യോഗസ്ഥർ, പോലീസ് ഉദ്യോഗസ്ഥർ എന്നിവർക്കെതിരായ അന്വേഷണത്തിന് അനുമതി തേടിയുള്ള അപേക്ഷയിൽ 120 ദിവസത്തിനുള്ളിൽ മറുപടിയില്ലെങ്കിൽ അനുമതി ലഭിച്ചതായി കരുതും.
3) സീറോ എഫ്‌ഐആർ രജിസ്റ്റർ ചെയ്ത് കഴിഞ്ഞാൽ 15 ദിവസത്തിനുള്ളിൽ ബന്ധപ്പെട്ട പോലീസ് സ്‌റ്റേഷനിലേക്ക് അയയ്‌ക്കണം. കുറ്റകൃത്യം നടന്ന സ്ഥലത്തെ പോലീസ് സ്‌റ്റേഷന് പകരം ഇന്ത്യയിലെ ഏത് സ്റ്റേഷനിലും പരാതി നൽകാമെന്നാണ് വ്യവസ്ഥ. ഇങ്ങനെ ഇതര സ്‌റ്റേഷനിൽ രജിസ്റ്റർ ചെയ്യുന്ന എഫ്‌ഐആറാണ് സീറോ എഫ്‌ഐആർ.
4) കേസ് രജിസ്റ്റർ ചെയ്യുന്നത് മുതൽ വിധി പുറപ്പെടുവിക്കുന്നതും വരെ നടപടികൾ ഡിജിറ്റലാകണം.
5) ക്രോസ് വിസ്താരം ഉൾപ്പെടെ വിചാരണ നടപടികൾ, അപ്പീൽ തുടങ്ങിയവ വീഡിയോ കോൺഫറൻസ് വഴിയാകും.
6) കേസുകളിൽ ഇരയാക്കപ്പെട്ടവരുടെ മൊഴികൾ വീഡിയോയിൽ ചിത്രീകരിക്കും.
7) അന്വേഷണത്തിന്റെ ഭാഗമായ തിരച്ചിൽ, കണ്ടെടുക്കൽ, തുടങ്ങിയ നടപടികൾ വീഡിയോയിൽ പകർത്തണം
8) കുറ്റകൃത്യത്തിൽ ഉൾപ്പെട്ട വാഹനങ്ങൾ പിടിച്ചെടുക്കുമ്പോൾ വീഡിയോഗ്രഫി നിർബന്ധം.
9) ഏഴ് വർഷത്തിൽ കൂടുതൽ ശിക്ഷയുള്ള കുറ്റകൃത്യങ്ങളുടെ കാര്യത്തിൽ ഫോറൻസിക് സംഘം സ്ഥലം സന്ദർശിച്ചിരിക്കണം.
10) മൊബൈൽ ഫോറൻസിക് യൂണിറ്റുകൾ ജില്ലാതലത്തിൽ അനിവാര്യം.
11) ദ്രുതഗതിയിൽ തീർപ്പക്കാവുന്ന കേസുകളുടെ പരിധി മൂന്ന് വർഷം വരെ ശിക്ഷ വിധിക്കാവുന്ന കേസുകൾ എന്നാകും.