മലയാള സിനിമയെ പ്രശംസിച്ച് വിജയ് ദേവരകൊണ്ട. മലയാളത്തിൽ എങ്ങനെയാണ് ഇത്രയും നല്ല സിനിമകൾ ഉണ്ടാകുന്നതെന്നും പുതിയ സിനിമകൾക്കായി താൻ കാത്തിരിക്കുകയാണെന്നും താരം പറഞ്ഞു. ‘ഖുഷി’യുടെ ട്രെയിലര് ലോഞ്ച് വേദിയിലായിരുന്നു മലയാള സിനിമയെ പ്രശംസിച്ച് നടൻ സംസാരിച്ചത്.
‘നമ്മളെല്ലാവരും മലയാള സിനിമകള് ഇഷ്ടപ്പെടുന്നുണ്ട്. മലയാളത്തില് എങ്ങനെ ഇത്ര നല്ല സിനിമകളും പ്രകടനങ്ങളും ഉണ്ടാവുന്നു എന്ന് ഞാന് ആലോചിക്കാറുണ്ട്. മലയാളത്തിലെ പുതിയ സിനിമകൾക്കായി ഞാൻ കാത്തിരിക്കുകയാണ്. ദുല്ഖറിന്റെ ‘കിങ്ങ് ഓഫ് കൊത്ത’യാണ് ഞാന് ഇപ്പോള് കാത്തിരിക്കുന്ന ചിത്രം.’ ദേവരകൊണ്ട പറഞ്ഞു.
സാമന്തയും വിജയ് ദേവരകൊണ്ടയും ഒന്നിക്കുന്ന രണ്ടാമത്തെ ചിത്രമാണ് ഖുഷി. ‘മജിലി’, ‘ടക്ക് ജഗദീഷ്’ തുടങ്ങിയ ചിത്രങ്ങള് ഒരുക്കിയ ശിവ നിര്വാണയാണ് ചിത്രത്തിന്റെ കഥയും തിരക്കഥയും സംവിധാനവും നിര്വഹിക്കുന്നത്. മലയാളിയായ ഹിഷാം അബ്ദുല് വഹാബാണ് സംഗീതം ഒരുക്കിയത്. സെപ്റ്റംബർ ഒന്നിന് ചിത്രം തിയേറ്ററുകളിൽ എത്തും.
ജയറാം ചിത്രത്തിലെ ഒരു പ്രധാനകഥാപാത്രമായി എത്തുന്നുണ്ട്. സച്ചിന് ഖേദേക്കര്, മുരളി ശര്മ്മ ലക്ഷ്മി, അലി, രോഹിണി, വെണ്ണേല കിഷോര്, രാഹുല് രാമകൃഷ്ണ, ശ്രീകാന്ത് അയ്യങ്കാര് എന്നിവരാണ് ചിത്രത്തിൽ മറ്റ് വേഷത്തിലെത്തുന്ന താരങ്ങൾ. മൈത്രി മൂവി മേക്കേഴ്സിന്റെ ബാനറില് നവീന് യേര്നേനിയും രവിശങ്കര് എലമഞ്ചിലിയുമാണ് നിര്മാണം. തെലുഗുവില് നിര്മിച്ച ചിത്രം മലയാളം, തമിഴ്, കന്നഡ, ഹിന്ദി ഭാഷകളിലും പുറത്തിറങ്ങും.
