ഇന്ത്യൻ സിനിമയുടെ ഐതിഹാസിക അഭിനേത്രിശ്രീദേവിക്ക് ഇന്ന് 60-ാം ജന്മവാർഷികം. അകാലത്തിൽ പൊലിഞ്ഞുപോയ അതുല്യ പ്രതിഭയോടുള്ള ആദര സൂചകമായി ഗൂഗിൾ ഡൂഡിലായി ശ്രീദേവിയുടെ ചിത്രമാണ് പ്രദർശിപ്പിച്ചിട്ടുള്ളത്. മുംബൈ സ്വദേശിയായ ആർട്ടിസ്റ്റ് ഭൂമിക മുഖർജിയാണ് ഡൂഡിൽ രൂപകൽപ്പന ചെയ്തത്. ഗൂഗിൾ സർച്ച് എഞ്ചിനിൽ ശ്രീദേവിയുടെ നൃത്തം ചെയ്യുന്ന ചിത്രമാണ് അണിയിച്ചൊരുക്കിയിരിക്കുന്നത്.
1962 ഓഗസ്റ്റ് 13-ന് തമിഴ്നാട്ടിലായിരുന്നു ശ്രീദേവിയുടെ ജനനം. നാലാമത്തെ വയസ്സിൽ തുണൈവൻ എന്ന ചിത്രത്തിലൂടെ വെള്ളിത്തിരയിൽ അരങ്ങേറ്റം കുറിച്ചു. ആദ്യ സിനിമയിൽ ബാല മുരുകനായിട്ടായിരുന്നു ശ്രീദേവി അഭിനയിച്ചത്. പിന്നീടുളള കരിയറിനിടെ മുന്നൂറോളം ചിത്രങ്ങളിലാണ് ശ്രീദേവി അഭിനയിച്ചത്. ഏകദേശം നാല് പതിറ്റാണ്ടോളം കാലം എതിരാളികളില്ലാതെ ഇന്ത്യൻ സിനിമയിൽ താരം നിറഞ്ഞു നിന്നു.
ശ്രീ അമ്മ യാംഗേർ അയ്യപ്പൻ എന്നായിരുന്നു ശ്രീദേവിയുടെ യഥാർത്ഥ പേര്. പിന്നീട് ഹിന്ദി സിനിമകളിൽ ഉൾപ്പടെ അഭിനയിച്ച ശേഷം പേര് മാറ്റുകയായിരുന്നു. തമിഴ്, തെലുങ്ക്, മലയാളം, കന്നഡ സിനിമകളിൽ ശ്രീദേവി അഭിനയിച്ചിട്ടുണ്ട്.
താരത്തിന്റെ അഭിനയ മികവിന് രാജ്യം പത്മശ്രീ പുരസ്കാരം നൽകി ആദരിച്ചിരുന്നു. ‘മോം’ എന്ന ചിത്രത്തിലെ അത്യുജ്ജ്വല പ്രകടനത്തിന് മരണാനന്തര ബഹുമതിയായി മികച്ച നടിക്കുള്ള ദേശീയ അവാർഡും ശ്രീദേവിക്ക് ലഭിച്ചു.
എംജിആറും ജയലളിതയും ഉൾപ്പടെ നിരവധി പ്രമുഖർക്കൊപ്പം ശ്രീദേവി അഭിനയിച്ചിട്ടുണ്ട്. ദക്ഷിണേന്ത്യയിലെ ഒന്നിലധികം ഭാഷകൾ ശ്രീദേവി അനായാസേന കൈകാര്യം ചെയ്യുമായിരുന്നു. ഇന്ത്യൻ സിനിമയുടെ ആദ്യ ലേഡി സൂപ്പർസ്റ്റാർ എന്നും ശ്രീദേവി അറിയപ്പെട്ടിരുന്നു.
ചലച്ചിത്ര നിർമ്മാതാവ് ബോണി കപൂറിനെയാണ് ശ്രീദേവി വിവാഹം കഴിച്ചത്. ജാൻവി കപൂറും ഖുഷി കപൂറും ആണ് മക്കൾ. 2018 ഫെബ്രുവരിയിൽ ദുബായിലെ ഒരു ഹോട്ടൽ മുറിയിൽ വെച്ചാണ് ശ്രീദേവി മരിച്ചത്. അപ്രതീക്ഷിതമായ നടിയുടെ വേർപാട് സിനിമാലോകത്തെ ഞെട്ടിച്ച വാർത്തയായിരുന്നു.
