സ്വാതന്ത്ര്യ ദിനത്തോടനുബന്ധിച്ച് ലഭിക്കുന്ന സമ്മാനപ്പെരുമഴയാണ് സമൂഹമാദ്ധ്യമങ്ങളിലെ ചർച്ചാ വിഷയം. എങ്ങും ആകർഷകമായ വിലക്കുറവും സമ്മാനങ്ങളും. ഇത്തരത്തിൽ യാത്രകൾക്ക് വേണ്ടി പ്ലാൻ ചെയ്യുന്നവരാണ് നിങ്ങളെങ്കിൽ ചില കിടിലൻ ഓഫറുകൾ ഇതാ. ജനപ്രീതി നേടിയ റൂട്ടുകളിൽ വെറും ഒരു രൂപയ്ക്ക് യാത്ര ചെയ്യുന്നതിനുള്ള അവസരമാണ് വന്നെത്തിയിരിക്കുന്നത്, ഗ്രീൻസെൽ മൊബിലിറ്റിയുടെ ഇന്റർസിറ്റി ഇലക്ട്രിക് എസി കോച്ച് സേവനമായ ന്യൂഗോ ആണ് സേവനം ലഭ്യമാക്കുന്നത്. ഇതിലൂടെ ഡൽഹി-ആഗ്ര, ഡൽഹി-ഡെറാഡൂൺ എന്നിവിടങ്ങളിലേക്ക് ഒരു രൂപ യാത്രാ നിരക്കിൽ സഞ്ചരിക്കാനാകും. സ്വാതന്ത്ര്യ ദിന ഓഫർ എന്ന നിലയിലാണ് കമ്പനി ഇത് അവതരിപ്പിച്ചിരിക്കുന്നത്.
വളരെ പെട്ടെന്ന് തന്നെ ബുക്കിംഗുകൾ ആരംഭിച്ചതിനാൽ യാത്ര ചെയ്യാൻ ആഗ്രഹിക്കുന്നവർ വൈകാതെ തന്നെ ബുക്ക് ചെയ്യണമെന്നാണ് പുറത്തു വരുന്ന റിപ്പോർട്ടുകൾ. ഓഗസ്റ്റ് 10-നാണ് ഇത്തരത്തിൽ യാത്ര ക്രമീകരിച്ചത്. ഓഗസ്റ്റ് 15 വരെയോ അല്ലെങ്കിൽ ടിക്കറ്റ് തീരുന്നത് വരെയോ ആകും യാത്ര ചെയ്യാനാകുക. കമ്പനി സർവീസ് നടത്തുന്ന റൂട്ടുകളിൽ ഈ സമയപരിധിയിൽ യാത്രചെയ്യുന്നവർ ഒരു രൂപ മാത്രം നൽകിയാൽ മതിയാകും.
രാജ്യത്തെ പ്രമുഖ നഗരങ്ങളെ തമ്മിൽ ബന്ധിപ്പിക്കുന്ന തരത്തിലാണ് ന്യൂഗോ ഇൻറർസിറ്റി സർവീസുകൾ നടത്തുന്നത്. ഡൽഹി-ആഗ്രാ, ഡൽഹി-ഡെറാഡൂൺ, ഡൽഹി-ജയ്പൂർ, ആഗ്രാ-ജയ്പൂർ, ചെന്നെ-പുതുച്ചേരി, ചെന്നൈ-തിരുപ്പതി, ബാംഗ്ലൂർ-തിരുപ്പതി, ഹൈദരാബാദ്-വിജയവാഡ എന്നീ റൂട്ടുകളിലും ന്യൂഗോ ഇന്റർസിറ്റി സർവീസുകൾ നടത്തുന്നുണ്ട്. ന്യൂ ഗോയുടെ വെബ്സൈറ്റ് മുഖേനയും മൊബൈൽ ആപ്ലിക്കേഷനിലൂടെയും ടിക്കറ്റുകൾ ബുക്ക് ചെയ്യാനാകും.
reencellmobility.com എന്ന വെബ്സൈറ്റിലെത്തി ന്യൂഗോ ഇൻറർസിറ്റി യാത്ര തിരഞ്ഞെടുക്കുക. അതിൽ യാത്ര ആരംഭിക്കുന്ന സ്ഥലം, ഇറങ്ങുന്ന സ്ഥലം എന്നിവ തിരഞ്ഞെടുത്ത് യാത്ര ചെയ്യുന്ന ആളുകളുടെ എണ്ണവും നൽകുക. തുടർന്ന് Bus1RupeeMein എന്നത് തിരഞ്ഞെടുത്ത് ടിക്കറ്റ് ബുക്ക് ചെയ്യാം. ഓഗസ്റ്റ് 15 വരെ ടിക്കറ്റ് ബുക്ക് ചെയ്യാൻ സാധിക്കുമെങ്കിലും ടിക്കറ്റ് തീരുന്നതിനു മുൻപായി ബുക്ക് ചെയ്യണമെന്നും നിർദ്ദേശമുണ്ട്.
