കൊൽക്കത്ത: ഡ്യൂറൻഡ് കപ്പിലെ കേരള ഡെർബി മത്സരത്തിൽ കേരളാ ബ്ലാസ്റ്റേഴ്സിനെതിരെ ഗോകുലം കേരളയ്ക്ക് ജയം. മൂന്നിനെതിരെ നാല് ഗോളുകൾക്കാണ് ഗോകുലത്തിന്റെ വിജയം. ആദ്യപകുതിയിൽ 3-1 ന് പിന്നിട്ട് നിന്ന ബ്ലാസ്റ്റേഴ്സ് രണ്ടാം പകുതിയിൽ മുന്നേറ്റം കാഴ്ച വെച്ചുവെങ്കിലും പരാജയപ്പെടുകയായിരുന്നു.
രണ്ട് മത്സരങ്ങളിൽ നിന്ന് ആറ് പോയിന്റുമായി ഗ്രൂപ്പിലെ ഒന്നാം സ്ഥാനക്കാരാണ് ഗോകുലം. എന്നാൽ കേരളാ ബ്ലാസ്റ്റേഴ്സിന്റേത് ആദ്യ മത്സരമായിരുന്നു.
മത്സരത്തിന്റെ 17-ാം മിനിറ്റിൽ ബൗബയിലൂടെ ഗോകുലം ആദ്യ ലീഡെടുത്തു. ജസ്റ്റിനിലൂടെ 35-ാം മിനിറ്റിൽ ബ്ലാസ്റ്റേഴ്സ് സമനില ഗോൾ കണ്ടെത്തി. കേരളാ ബ്ലാസ്റ്റേഴ്സ് ഇതിന് ശേഷം ആക്രമണം അഴിച്ചുവിട്ടെങ്കിലും 42-ാം മിനിറ്റിൽ ശ്രീക്കുട്ടനിലൂടെ ഗോകുലം ലീഡ് ഉയർത്തി. ഈ സീസണിലെ ശ്രീക്കുട്ടന്റെ രണ്ടാം ഗോളാണിത്. ആദ്യപകുതിയിൽ അലക്സ് സാഞ്ചെസിലൂടെ ഗോകുലം മൂന്നാം ഗോളുംകണ്ടെത്തി.
രണ്ടാം പകുതിയിൽ കേരളാ ബ്ലാസ്റ്റേഴ്സ് കളിയിലേക്ക് തിരികെ വരാൻ ശ്രമിക്കുമ്പോഴേക്കും അഭിജിത്തിലൂടെ ഗോകുലം നാലാം ഗോൾ കണ്ടെത്തുകയായിരുന്നു. 54-ാം മിനിറ്റിൽ പ്രബീർ ദാസിലൂടെ കേരള ബ്ലാസ്റ്റേഴ്സ് ഒരുഗോൾ കൂടെ മടക്കി. ഇതിനിടെ ഇരുടീമുകളും മാറ്റങ്ങൾ വരുത്തിയെങ്കിലും 77-ാം മിനിറ്റിലൂടെ അഡ്രിയാൻ ലൂണയിലുടെ ബ്ലാസ്റ്റേഴ്സ് സ്കോർ 4-3 ആക്കി.
Comments