ഇന്ത്യൻ ക്രിക്കറ്റ് ടീമിന്റെ സ്റ്റാർ വിക്കറ്റ് കീപ്പറും ബാറ്റ്സ്മാനുമാണ് ഋഷഭ് പന്ത്. താരത്തിന്റെ തിരിച്ചു വരവിനായി ഏറെ നാളുകളായി ആരാധകർ പ്രതീക്ഷയോടെ കാത്തിരിക്കുകയായിരുന്നു. ഇപ്പോഴിതാ ആരാധകരെ ആവേശം കൊള്ളിക്കുന്ന വീഡിയോ ആണ് വൈറലായിരിക്കുന്നത്. കഴിഞ്ഞ വർഷം അവസാനം വാഹനപാകടത്തിൽ പരിക്കേറ്റ പന്ത് ബാറ്റിംഗ് പരിശീലനം പുനരാരംഭിക്കുന്നതിന്റെ ദൃശ്യങ്ങളാണ് സമൂഹമാദ്ധ്യമങ്ങളിൽ ശ്രദ്ധേയമാകുന്നത്.
സ്വന്തം നാടായ റൂർക്കിയിലേക്ക് മടങ്ങവെയാണ് ഡൽഹി-ഡെറാഡൂൺ ഹൈവേയിൽ വെച്ച് ഋഷഭിന്റെ വാഹനം അപകടത്തിൽ പെടുന്നത്. വാഹനാപകടത്തിൽ താരത്തിന്റെ തലയ്ക്കും മുതുകിനും കാലിനും ഗുരുതരമായി പരിക്കേറ്റിരുന്നു. ഇതിന് ശേഷം നീണ്ട ഇടവേളയ്ക്ക് ശേഷമാണ് താരത്തിന്റെ തിരിച്ചു വരവ്. എത്രയും വേഗം ഋഷഭ് കളത്തിലിറങ്ങണമെന്ന ആരാധകരുടെ പ്രാർത്ഥനയ്ക്ക് പിന്നാലെയാണ് സ്വപ്നം യാഥാർത്ഥ്യമായിരിക്കുന്നത്.
ഡൽഹിയിലെ ഗ്രൗണ്ടിലാണ് ഋഷഭ് പന്ത് ബാറ്റ് ചെയ്യുന്നത്. ആരാധകരുടെ ആർപ്പുവിളികളോടെ താരം ക്രീസിൽ എത്തുന്നത് വീഡിയോയിൽ നിന്ന് ദൃശ്യമാണ്. തനിക്ക് മാറ്റങ്ങളൊന്നുമില്ലെന്ന് തെളിയിക്കുന്ന നിരവധി ഷോട്ടുകളും ഋഷഭ കാഴ്ചവെച്ചു. 2023 ലോകകപ്പിന് ശേഷം താരം മടങ്ങിയെത്തുമെന്ന പ്രതീക്ഷയിലാണ് ആരാധകർ.
Comments