ന്യൂഡൽഹി: പ്രതിപക്ഷ ഐക്യത്തിൽ വിള്ളൽ വിഴ്ത്തികൊണ്ട് ആംആദ്മി പാർട്ടി. പ്രതിപക്ഷ സഖ്യത്തിൽ പുനർചിന്തനം നടത്തേണ്ടി വരുമെന്നാണ് ആംആദ്മി പാർട്ടിയുടെ നിലപാട്. കോൺഗ്രസ് നേതൃത്വം നൽകുന്ന പ്രതിപക്ഷ സഖ്യത്തിൽ ചേരുന്നതിൽ ചിന്തിക്കേണ്ടിയിരിക്കുന്നു എന്നാണ് ആംആദ്മി പാർട്ടി വക്താവ് പ്രിയങ്ക കക്കർ മാദ്ധ്യമങ്ങളോട് പറഞ്ഞത്. ഡൽഹയിലും ദേശീയ തലത്തിലും കോൺഗ്രസ് സ്വീകരിക്കുന്നത് ഇരട്ട നിലപാടാണെന്ന് കക്കർ പറഞ്ഞു. ഡൽഹിയിൽ കോൺഗ്രസിന് ആംആദ്മി പാർട്ടിയുമായി സഖ്യമുണ്ടാക്കാൻ സാധിക്കില്ലെങ്കിൽ പിന്നെ ദേശീയ തലത്തിൽ സഖ്യമുണ്ടാക്കുന്നതിൽ അർത്ഥം എന്താണെന്നായിരുന്നു ആംആദ്മി പാർട്ടിയുടെ ചോദ്യം.
‘ഡൽഹിയിൽ തങ്ങൾക്കൊപ്പം സഖ്യമുണ്ടാക്കാൻ കോൺഗ്രസിന് താത്പര്യമില്ലെങ്കിൽ, ദേശീയ തലത്തിൽ സഖ്യമുണ്ടാക്കുന്നതിൽ അർത്ഥമില്ല. അത് സമയം പാഴാക്കുന്നതാണ്. പ്രതിപക്ഷത്തിന്റെ അടുത്ത യോഗത്തിൽ പങ്കെടുക്കണമോ വേണ്ടയോ എന്ന് പാർട്ടിയുടെ ഉന്നത നേതൃത്വം തീരുമാനിക്കും.’ – പ്രിയങ്ക കക്കർ പറഞ്ഞു
പ്രതിപക്ഷം പിറന്നതിന് പിന്നാലെ അതിലെ അസ്വാരസ്യങ്ങളും മറനീക്കി പുറത്തുവരികയാണ്. തൃണമൂൽ അടക്കമുള്ള പാർട്ടികൾക്ക് അവരുടെ സ്വന്തം സംസ്ഥാനങ്ങളിൽ കോൺഗ്രസുമായി കടുത്ത ഭിന്നതയാണ് ഇവർക്കുള്ളത്. എന്നാൽ ദേശീയ തലത്തിൽ എത്തുമ്പോൾ എല്ലാവരും ഒരു കുടക്കീഴിലാണ്. ബിജെപി നയിക്കുന്ന എൻഡിഎ പ്രതിപക്ഷത്തിന്റെ ഈ ഇരട്ടത്താപ്പിനെ തുറന്നുകാണിച്ചിരുന്നു. മുംബൈയിലാണ് പ്രതിപക്ഷ ഐക്യത്തിന്റെ അടുത്ത യോഗം. യോഗത്തിന് ദിവസങ്ങൾ മാത്രം ബാക്കി നിൽക്കെയാണ് ആംആദ്മിയുടെ തുറന്നുപറച്ചിൽ. ഇത് പ്രതിപക്ഷ നിരയ്ക്ക് കനത്ത പ്രഹരമാണ് ഏൽപ്പിക്കുന്നത്.
Comments