സര്‍ക്കാര്‍ സംവിധാനങ്ങള്‍ ഓണ്‍ലൈനായി ജനങ്ങളിലെത്തിക്കുന്നതിന് വേണ്ടി ആരംഭിച്ച പദ്ധതിയാണ് അക്ഷയകേന്ദ്രങ്ങള്‍. കൃത്യമായ രീതിയില്‍ മുന്നോട്ട് പോകുന്നു എന്നതിനാല്‍ പ്രതിസന്ധി നേരിടുന്നവയും തിരിമറിയിലൂടെ ലാഭം കൊയ്യുന്നവയും ഇക്കൂട്ടത്തിലുണ്ട്. ഐടി മിഷന്‌റെ കീഴില്‍ 2002-ലാണ് അക്ഷയകേന്ദ്രങ്ങള്‍ ആരംഭിക്കുന്നത്. ചുരുങ്ങിയത് 300 ചതുരശ്ര അടി റൂമും മൂന്ന് കമ്പ്യൂട്ടറും വേണമെന്നായിരുന്നു നിര്‍ദ്ദേശം. എന്നാല്‍ 1000 ചതുരശ്ര അടി റൂമും 10 കമ്പ്യൂട്ടറും ജീവനക്കാരും വരെയുള്ള സെന്ററുകള്‍ ഇന്ന് പ്രവര്‍ത്തിക്കുന്നുണ്ട്. ഇവയിലെ സേവന നിരക്കുകള്‍ നോക്കാം..
നിലവിലെ സേവന നിരക്കുകള്‍
മുമ്പ് അക്ഷയകേന്ദ്രങ്ങളിലൂടെ ലഭ്യമാകുന്ന 36 തരം സേവനങ്ങളുടെ നിരക്കുകള്‍ സംസ്ഥാന ഐടി കമ്മീഷന്‍ പ്രസിദ്ധീകരിച്ചിരുന്നു. ഇവയില്‍ പ്രധാനപ്പെട്ടത്.
- ഇ-ഡിസ്ട്രിക്ട് സേവനങ്ങള്‍ ജനറല്‍ വിഭാഗം 25 രൂപ
- തിരിച്ചറിയല്‍ കാര്‍ഡിന് അപേക്ഷിക്കുന്നതിന് 40 രൂപ
- മുഖ്യമന്ത്രിയുടെ ദുരിതാശ്വാസ നിധി അപേക്ഷ 20 രൂപ
- വിവാഹ രജിസ്‌ട്രേഷന് 70 രൂപ
- ലൈഫ് സര്‍ട്ടിഫിക്കറ്റ് 30 രൂപ
- പാന്‍കാര്‍ഡ് 80 രൂപ
2018-ലാണ് അക്ഷയ കേന്ദ്രങ്ങള്‍ക്ക് സേവന നിരക്ക് നടപ്പാക്കുന്നത്. രണ്ട് വര്‍ഷത്തില്‍ ഒരിക്കല്‍ ഫീസ് പുനര്‍ നിശ്ചയിക്കും എന്നായിരുന്നു അന്ന് എടുത്ത തീരുമാനം. ചെലവുകളില്‍ വന്‍ വര്‍ദ്ധനവുണ്ടായിട്ടും പിന്നീട് നിരക്ക് കൂട്ടിയിരുന്നില്ല. നിരക്ക് തീരുമാനിക്കുമ്പോള്‍ ഒരു പായ്‌ക്കറ്റ് പേപ്പറിന് 160 രൂപ ആയിരുന്നു എങ്കില്‍ ഇന്നത് 300 രൂപയിലെത്തി. ഇത്തരത്തില്‍ എല്ലാത്തിലും വര്‍ദ്ധനവുണ്ടായതോടെ ചില അക്ഷയ കേന്ദ്രങ്ങള്‍ കൊള്ള ലാഭം കൊയ്യുകയും ചിലത് പ്രതിസന്ധിയില്‍ ആകുകയുമായിരുന്നു.
