പനാജി: ഗോവ ഗവർണർ പി.എസ്. ശ്രീധരൻ പിള്ളയുടെ മൂന്നു പുസ്തകങ്ങൾ പ്രകാശനം ചെയ്തു.
കവിതാ സമാഹാരമായ എന്റെ പ്രിയ കവിതകൾ, ഇംഗ്ലീഷ് പുസ്തകങ്ങളായ ഹെറിറ്റേജ് ട്രീസ് ഓഫ് ഗോവ, വെൻ പാരലൽ ലൈൻസ് മീറ്റ് എന്നിവയുമാണ് പ്രകാശനം ചെയ്തത്.
ഗോവ ഗ്രാമങ്ങളിലെയും വിവിധ ആരാധനാലയങ്ങളിലെയും നൂറ്റാണ്ടുകൾ പഴക്കമുള്ള പൈതൃക വൃക്ഷങ്ങൾ കണ്ടെത്തി, അവയെക്കുറിച്ച് രചിച്ച പുസ്തകമാണ് ഹെറിറ്റേജ് ട്രീസ് ഓഫ് ഗോവ.
ഗോവ സമ്പൂർണ്ണ യാത്രയുടെ ഭാഗമായുള്ള രചനയാണിത്. കേരള ഗവർണർ ആരിഫ് മുഹമ്മദ് ഖാനും കേരളം, മിസോറാം, ഗോവ എന്നിവിടങ്ങളിലെ മുഖ്യമന്ത്രിമാരും പ്രതിപക്ഷ നേതാക്കന്മാരും ഗവർണർ ശ്രീധരൻ പിള്ളയുടെ വിവിധ പുസ്തക പ്രകാശന ചടങ്ങുകളിൽ നടത്തിയ പ്രസംഗങ്ങളുടെ സമാഹാരമാണ് വെൻ പാരലൽ ലൈൻസ് മീറ്റ്. ശ്രീധരൻ പിള്ളയുടെ കവിതകളിൽ നിന്ന് തെരഞ്ഞെടുക്കപ്പെട്ടവയുടെ സമാഹാരമാണ് എന്റെ പ്രിയ കവിതകൾ. ഇതുവരെ ഇരുന്നൂറ് പുസ്തകങ്ങളാണ് പിഎസ് ശ്രീധരൻ പിള്ള രചിച്ചിട്ടുള്ളത്.
ഗോവ മുഖ്യമന്ത്രി ഡോ പ്രമോദ് സാവന്ത് ചടങ്ങ് ഉദ്ഘാടനം ചെയ്തു. പശ്ചിമ ബംഗാൾ ഗവർണർ ഡോ സിവി ആനന്ദബോസ് ,ഗോവ ആർച്ച് ബിഷപ്പ് ഫിലിപ്പ് നേരി കർദ്ദിനാൾ ഫെറൗ, ഗോവ രാമകൃഷ്ണ മിഷൻ സെക്രട്ടറി സ്വാമി മഹേഷാത്മാനന്ദ തുടങ്ങിയവർ ചടങ്ങിൽ പങ്കെടുത്തു.
