തിരുവോണ ദിനത്തിൽ ഒഴിച്ചുകൂടാൻ പറ്റാത്ത ഒന്നാണ് ഓണ സദ്യ. 26 കൂട്ടം വിഭവങ്ങളാണ് വാഴയിലയിൽ നിരന്നിരിക്കുക. ഓണദിനത്തിൽ ഈ 26 കൂട്ടവും ഇലയിൽ വിളമ്പുന്നതിന് പ്രത്യേക സ്ഥാനവും കഴിക്കുന്നതിനായി പ്രത്യേക ക്രമവും ഉണ്ട്. ഓണ സദ്യയിലെ പ്രധാന ഘടകം വാഴയിലയാണ്. വാഴയിലയിൽ സദ്യ വിളമ്പി പൊന്നോണ നാളിൽ കഴിക്കുക എന്നത് ഏതൊരു മലയാളിയുടെയും സ്വപ്നമാണ്. സദ്യയ്ക്കായുള്ള വാഴയില ഇടുന്നതിനും രീതിയുണ്ട്. തൂശനിലയുടെ തലഭാഗം അതായത് വീതി കുറഞ്ഞ വശം കഴിക്കാൻ ഇരിക്കുന്ന വ്യക്തിയുടെ ഇടത് വശത്ത് വരത്തക്ക രീതിയിലാകണം ഇല ഇടേണ്ടത്.
ഇതിന് ശേഷം സദ്യയ്ക്കായി ഓരോ വിഭവങ്ങളും വിളമ്പും. ഇവ ഓരോന്നിനും അതിന്റേതായ സ്ഥാനമുണ്ട്. സദ്യയിൽ ആദ്യം വിളമ്പേണ്ടത് ഉപ്പാണ്. ഇതിന് ശേഷം പപ്പടം, പഴം, ശർക്കര വരട്ടി, കായവറുത്തത്, പുളി ഇഞ്ചി, അച്ചാർ, ഓലൻ, കാളൻ, എരിശേരി, പുളിശേരി, അവിയൽ, കൂട്ടുകറി, തോരൻ, മെഴുക്കുപുരട്ടി, പച്ചടി, കിച്ചടി, ഇലയുടെ നടുക്കായി ചോറ് ഇങ്ങനെയാണ് ക്രമം. ഇതിന് ശേഷം പരിപ്പും നെയ്യും വിളമ്പും. അതിന് ശേഷമാകും സാമ്പാർ, മോരുകറി, ഉള്ളി തീയൽ, രസം, സംഭാരം എന്നിവ വിളമ്പും. ശേഷമാണ് പായസം നൽകുന്നത്.
സദ്യ കഴിക്കേണ്ട രീതി
സദ്യയിൽ ആദ്യം കഴിക്കേണ്ടത് ശർക്കരവരട്ടിയും കായ വറുത്തതുമാണ്. ഇതിന് ശേഷം ചോറ് കഴിക്കാം. നെയ്യും പരിപ്പും കൂട്ടിയാണ് ആദ്യം ചോറ് കഴിക്കേണ്ടത്. ഇതിന് ശേഷം പുളിയിഞ്ചി കൂട്ടണം. പുളിയിഞ്ചിക്ക് പകരം മധുരമുള്ള കറികളാണ് കൂട്ടേണ്ടത്. ഇവയിൽ പൈനാപ്പിൾ പച്ചടി ഉണ്ടെങ്കിൽ അതിൽ തുടങ്ങാവുന്നതാണ്. ഇതിന് ശേഷം കഴിക്കേണ്ടത് മത്തൻ എരിശേരിയാണ്. തുടർന്ന് കാളൻ, അവിയൽ, പച്ചടി, എരിശേരി എന്നിവ കഴിക്കാവുന്നതാണ്.
ഏതൊരു കറി രുചിക്കുന്നതിന് മുമ്പും ഒരൽപ്പം ഓലൻ കഴിക്കുന്നത് നല്ലതാണ്. ഇത് കഴിക്കുമ്പോൾ നാവ് വൃത്തിയാകും. ഇതിനാൽ തന്നെ കറിയുടെ രുചി മനസിലാക്കാൻ സാധിക്കും. മധുരവും പുളിയും ഉള്ള കറികൾ രുചിച്ച ശേഷം പിന്നീട് കഴിക്കേണ്ടത് ഉപ്പും എരിവുമുള്ള കറികളാണ്. അച്ചാർ, പച്ചടി, തോരൻ, ഇലവർഗങ്ങൾ എന്നിവ കഴിക്കാവുന്നതാണ്. ചോറും സാമ്പാറും കഴിച്ചതിന് ശേഷം രസവും കൂട്ടിയും ചോറ് കഴിക്കാവുന്നതാണ്. പായസം കുടിച്ചതിന് ശേഷം മോര് കൂട്ടി വീണ്ടും ഇത്തിരി ചോറ് കൂടി കഴിക്കണം. ദഹനം നന്നായി നടക്കുന്നതിനും മധുരത്തിന്റെ ആലസ്യം കുറയ്ക്കുന്നതിനും ഇത് സഹായിക്കും. ഏറ്റവും ഒടുവിൽ പായസത്തിനൊപ്പമോ അല്ലാതെയൊ പഴം കൂടി കഴിക്കുന്നതോടെ ഇല മടക്കാം.
Comments