അടുത്തിടെയാണ് തങ്ങൾക്ക് രണ്ടാമതൊരു പെൺകുഞ്ഞ് കൂടി പിറന്ന വിവരം ഗിന്നസ് പക്രു സമൂഹമാദ്ധ്യമങ്ങളിലൂടെ പങ്കുവെച്ചത്. ഇപ്പോഴിതാ കുഞ്ഞിന്റെ ചോറൂണുമായി ബന്ധപ്പെട്ട ചിത്രങ്ങളാണ് സമൂഹമാദ്ധ്യമങ്ങളിൽ ശ്രദ്ധേയമാകുന്നത്. കുഞ്ഞിന്റെ പേരിടൽ ചടങ്ങിന്റെ ചിത്രങ്ങളും ചോറ്റാനിക്കര ക്ഷേത്രത്തിൽ വെച്ച് നടന്ന ചോറൂണിന്റെ ചിത്രങ്ങളുമെല്ലാം താരം സമൂഹമാദ്ധ്യമങ്ങളിലൂടെ പങ്കുവെച്ചിരുന്നു. ഇപ്പോഴിതാ കുഞ്ഞിന് ഗുരുവായൂർ അമ്പല നടയിലിരുത്തി ചോറൂണ് നടത്തുന്നതിന്റെ ചിത്രങ്ങളാണ് പോസ്റ്റ് ചെയ്തിരിക്കുന്നത്.
ഗിന്നസ് പക്രുവിന്റെ ഭാര്യ ഗായത്രിയുടെ ഇൻസ്റ്റഗ്രാം അക്കൗണ്ടിലൂടെയാണ് ചിത്രങ്ങൾ പങ്കുവെച്ചിരിക്കുന്നത്. ഗിന്നസ് പക്രുവും ഭാര്യയും മൂത്ത മകളും ബന്ധുക്കളും അടങ്ങുന്ന ചിത്രങ്ങൾ ഇതിനോടകം തന്നെ സമൂഹമാദ്ധ്യമങ്ങളിൽ വൈറലായി. എല്ലാ ചടങ്ങുകളിലും കുടുംബം ഒരേ ഡ്രസ് കോഡാണ് ഉപയോഗിക്കുന്നത്. ഇത് ചോറൂണിനും മാറ്റ് കൂട്ടി.
വിനായക ചതുർത്ഥി നാളിലാണ് ഗുരുവായൂരിൽ വെച്ച് ചോറൂണ് നടത്തിയത്. ദ്വിജ കീർത്തി എന്നാണ് ഗിന്നസ് പക്രുവിന്റെ ഇളയ മകളുടെ പേര്. മൂത്തകൾ ദീപ്ത കുഞ്ഞിനെ എടുത്ത് നിൽക്കുന്ന ചിത്രത്തിനൊപ്പം ചേച്ചിയമ്മ എന്ന അടിക്കുറിപ്പ് നൽകിയായിരുന്നു ഗിന്നസ് പക്രു സന്തോഷ വാർത്ത പങ്കുവെച്ചത്.
