വീട്ടുജോലികളും മറ്റു തിരക്കുകളും കാരണം കുഞ്ഞുങ്ങളുടെ കയ്യിൽ മൊബൈൽഫോണോ, ടാബോ കൊടുത്ത് മാതാപിതാക്കൾ തിരക്കുകളിൽ ഏർപ്പെടുന്നതാണ് മിക്ക വീടുകളിലേയും അവസ്ഥ. കുഞ്ഞുങ്ങൾ ഭക്ഷണം കഴിക്കണമെങ്കിൽ പോലും അവർക്ക് ഇപ്പോൾ മൊബൈൽഫോൺ അനിവാര്യമാണ്. മാതാപിതാക്കൾക്ക് ജോലിഭാരം കുറയുമെങ്കിലും ഇത് കുട്ടികളിൽ നിരവധി ആരോഗ്യപ്രശ്നങ്ങൾക്ക് കാരണമാകുന്നു. അവരുടെ ബുദ്ധിവികാസത്തിൽ തകരാറുകൾ സംഭവിക്കാനും ഇത് കാരണമാകുന്നുണ്ടെന്നാണ് പഠനങ്ങൾ സൂചിപ്പിക്കുന്നത്.
രണ്ട് വയസ് മുതൽ നാല് വയസു വരെയുള്ള കുട്ടികളിൽ നടത്തിയ പഠനത്തിൽ 4 മണിക്കൂറിലധികമുള്ള മൊബൈൽഫോൺ, ടിവി എന്നിവയുടെ സ്ക്രീൻ ടൈം കുഞ്ഞുങ്ങളുടെ ബുദ്ധി വികാസത്തെ ബാധിക്കുന്നെന്ന് വിദഗ്ധർ കണ്ടെത്തി. ജപ്പാൻ ആസ്ഥാനമാക്കി നടത്തിയ പഠനത്തിൽ ഗർഭിണികളായ സ്ത്രീകൾ അധികസമയം ഇത്തരം സാങ്കേതികവിദ്യകളിൽ സമയം ചെലവഴിക്കുന്നത് ഗർഭസ്ഥ ശിശുവിന്റെ ആരോഗ്യത്തെ മോശമായി ബാധിക്കുമെന്നും പ്രസവശേഷം അമ്മമാരിൽ വിഷാദരോഗങ്ങൾ പിടിപ്പെടാൻ കാരണമാകുന്നെന്നും പറയുന്നു.
അമിതമായി സ്മാർട്ട്ഫോണുകളിൽ സമയം ചെലവഴിക്കുന്നത് കുട്ടികളിൽ സംസാരവൈകല്യമുണ്ടാക്കുന്നതിനാൽ ഇവയുടെ ഉപയോഗം നിയന്ത്രിക്കാൻ വിദഗ്ധർ നിർദ്ദേശിക്കുന്നു. അതിനോടൊപ്പം വിദ്യാഭ്യാസ കാര്യങ്ങൾക്കായി കുഞ്ഞുങ്ങൾക്ക് ഇത്തരം സാങ്കേതികവിദ്യകൾ പരിമിതമായ സമയം കണക്കിലെടുത്ത് നൽകുന്നത് വിദ്യാഭ്യാസ നൈപുണ്യം വർദ്ധിപ്പിക്കുന്നതിന് സഹായകരമാണ്.
