ആൻഡ്രോയിഡ് സ്മാർട്ട്ഫോണുകളുടെ പോരാട്ടക്കളത്തിൽ റിയൽമിയോ, റെഡ്മിയോ ആരാണ് കേമൻ എന്ന ചോദ്യം ബാക്കി നിൽക്കെ അടുത്ത കേമനെ വിപണിയിൽ അവതരിപ്പിച്ചിരിക്കുകയാണ് റെഡ്മി. ഇന്ത്യൻ വിപണിയിൽ റെഡ്മി സ്മാർട്ട്ഫോണുകൾക്കുള്ള ജനപ്രീതി വേറെ തന്നെയാണ്. ഇപ്പോഴിതാ, അടുത്ത താരമാകാൻ റെഡ്മി എ2+ ആണ് കമ്പനി വിപണിയിൽ അവതരിപ്പിച്ചിരിക്കുന്നത്. ഈ സ്മാർട്ട്ഫോണിന്റെ കൂടുതൽ വിവരങ്ങൾ അറിയാം..
റെഡ്മി എ2+ സ്മാർട്ട്ഫോൺ സവിശേഷതകൾ
6.52 ഇഞ്ച് എച്ച്ഡി+ ഡിസ്പ്ലെയും 120Hz ടച്ച് സാപ്ലിംഗ് റേറ്റുമാണ് ഈ സമാർട്ട്ഫോണിലുള്ളത്. മീഡിയടെക് ഹീലിയോ ജി36 എസ്ഒസിയാണ് ഡിവൈസിന് കരുത്തേകുന്നത്. 4ജിബി റാമാണ് കമ്പനി ഈ സ്മാർട്ട്ഫോണിൽ നൽകിയിരിക്കുന്നത്. എന്നാൽ 3 ജിബി വരെ സ്റ്റോറേജിൽ നിന്നും കടമെടുത്ത് റാം വർദ്ധിപ്പിക്കാനുള്ള മെമ്മറി ഫ്യൂഷൻ സാങ്കേതിക വിദ്യയും ഈ ഫോണിൽ നൽകിയിട്ടുണ്ട്.
വിലയും ലഭ്യതയും
10,000 രൂപയിൽ താഴെയുള്ള ഒരു സ്മാർട്ട്ഫോൺ തേടുന്നവർക്ക് സന്തോഷവാർത്തയായിട്ടാണ് റെഡ്മി എത്തിയിരിക്കുന്നത്. 8,499 രൂപയാണ് റെഡ്മി എ2+ സ്മാർട്ട്ഫോണിന്റെ വിലയായി വരുന്നത്. ആമസോൺ, എംഐ.കോം, ഷവോമി റീട്ടെയിൽ പാർട്ട്ണർ സ്റ്റോറുകൾ എന്നിവയിലൂടെ ഈ ഡിവൈസ് നിങ്ങൾക്ക് സ്വന്തമാക്കാവുന്നതാണ്. ക്ലാസിക് ബ്ലാക്ക്, സീ ഗ്രീൻ, അക്വാ ബ്ലൂ എന്നീ നിറങ്ങളിലാണ് ഡിവൈസ് വിപണിയിൽ അവതരിപ്പിച്ചിരിക്കുന്നത്.
ക്യാമറ സവിശേഷതകൾ
എഐ സാങ്കേതികവിദ്യാ സജ്ജീകരണത്തോടു കൂടി ഡ്യുവൽ റിയർ ക്യാമറ സെറ്റപ്പാണുള്ളത്. 8 മെഗാപിക്സൽ പ്രൈമറി സെൻസറാണ് ഈ സെറ്റപ്പിൽ കമ്പനി നൽകിയിരിക്കുന്നത്. ഫ്രണ്ട് ക്യാമറയായി 5 മെഗാപിക്സൽ ക്യാമറയാണുള്ളത്.
ബാറ്ററി, കണക്ടിവിറ്റി ഓപ്ഷനുകൾ
4ജിബി റാമും 5,000mAh ബാറ്ററിയുമായിട്ടാണ് റെഡ്മി എ2+ സ്മാർട്ട്ഫോൺ അവതരിപ്പിച്ചിരിക്കുന്നത്. ചാർജർ സംവിധാനം കമ്പനി ഈ സ്മാർട്ട്ഫോണിന്റെ കൂടെ നൽകുന്നതായിരിക്കും. ഒറ്റ ചാർജിംഗിൽ 32 മണിക്കൂർ വരെ കോളിംഗ് സമയം ലഭിക്കുമെന്നാണ് കമ്പനിയുടെ വാദം.
