2023 ആഗസ്റ്റ് 27 മുതൽ 2023 സെപ്റ്റംബർ 02 വരെയുള്ള (1119 ചിങ്ങം 11 മുതൽ ചിങ്ങം 17 വരെ) ചന്ദ്രരാശി പൊതു വാരഫലം
തിരുവോണം, ഗണേശോത്സവം, ആവണി അവിട്ടം, പൗർണമി, ഗുരുദേവ ജയന്തിയായ ചതയദിനം ഒക്കെയും ഈ വാരത്തിൽ ആണ്. മൂലം, പൂരാടം, ഉത്രാടം, തിരുവോണം, അവിട്ടം, ചതയം, പൂരൂരുട്ടാതി, ഉത്തൃട്ടാതി നക്ഷത്രക്കാർ അവരവരുടെ നക്ഷത്രം വരുന്ന ദിവസം വൃതം അനുഷ്ഠിക്കുന്നതും ആചാര പ്രകാരം ക്ഷേത്രത്തിൽ പോയി തൊഴുതു യഥാവിധി വഴിപാടുകൾ നടത്തുന്നത് ഉചിതമായിരിക്കും.
വാര – മാസഫലങ്ങൾ ഗണിക്കുന്നത് പൊതുവെ ഉള്ള ഗ്രഹസ്ഥിതി അടിസ്ഥാനപ്പെടുത്തിയാണ്. ഇവിടെ പറയുന്നത് ഒരു പൊതു സൂചന മാത്രമായിരിക്കും എന്ന് മനസിലാക്കുക. അവരവരുടെ ജന്മഗ്രഹനില അനുസരിച്ചു യോഗങ്ങളും ദശാപഹാരവും ഒക്കെകൂടി പരിഗണിച്ചാൽ ഈ പൊതു ഫലത്തിന് അനുഭവത്തിൽ ഏറ്റ കുറച്ചിലുകൾ ഉണ്ടാകും. എന്നിരുന്നാലും ഈ പറയുന്ന പൊതുഫലത്തെ സൂചനയായി കണ്ടു, ജാതക നിരൂപണം നടത്തി, ദശാനാഥനെ പ്രീതിപ്പെടുത്തുകയും ഗ്രഹദോഷങ്ങൾ പരിഹരിക്കുകയും ചെയ്താൽ നല്ല സമയത്തിന്റെ ഗുണഫലങ്ങൾ അനുഭവത്തിൽ വരുത്തുവാനും, മോശം സമയം തരണം ചെയ്യുവാനും പ്രയോജനപ്പെടും.
മേടം രാശി: (അശ്വതി, ഭരണി, കാർത്തിക ആദ്യ 1/4 ഭാഗം)
തൊഴിൽ അന്വേഷകർക്ക് സന്തോഷവാർത്ത ലഭിക്കുന്ന വാരമാണ്. സർക്കാർ പരീക്ഷകൾ എഴുതിയവർക്ക് അനുകൂല ഫലം ഉണ്ടാകും. സാമ്പത്തിക മാനസിക ശാരീരികസൗഖ്യം വരുന്ന കാലമാണ്. കുടുംബത്തിൽ മംഗള കർമ്മങ്ങൾ അരങ്ങേറും. എന്നിരുന്നാലും കോടതി വിഷയങ്ങളിൽ പരാജയം സംഭവിച്ചേക്കാം.
ഇടവം രാശി: (കാർത്തിക അവസാന 3/4 ഭാഗം, രോഹിണി, മകയിര്യം ആദ്യ 1/2 ഭാഗം)
ഭക്ഷണത്തിൽ ജാഗ്രത പുലർത്തുക, വിഷബാധ സംഭവിക്കാം. അനാവശ്യ കൂട്ടുകെട്ടുകൾ സാമ്പത്തിക നഷ്ട്ടവും മാനഹാനിയും ഉണ്ടാക്കും. ബിസിനസ്സ് ചെയ്യുന്നവർക്ക് അപ്രതീക്ഷിത ലാഭം ഉണ്ടാകും.സ്വജനങ്ങൾ ആയി കലഹം ഉണ്ടാക്കതെ ശ്രദ്ധിക്കുക.
മിഥുനം രാശി: (മകയിര്യം അവസാന 1/2 ഭാഗം, തിരുവാതിര, പുണർതം ആദ്യ 3/4 ഭാഗം)
രാഷ്ട്രീയക്കാർ അന്യജനങ്ങളാൽ അറിയപ്പെടും. വാഹനഭാഗ്യം, പ്രണയസാഫല്യം ഒക്കെ ഉണ്ടാകും. മേലധികാരിയുടെ പ്രശംസ, സമ്മാനം ഒക്കെ പ്രതീക്ഷിക്കാം. ആരോഗ്യം സൂക്ഷിക്കുക. ഉദര, ആമാശയ രോഗങ്ങൾ ഉള്ളവർ വളരെ സൂക്ഷിക്കുക.
കർക്കിടകം രാശി: (പുണർതം അവസാന 1/4 ഭാഗം, പൂയം, ആയില്യം)
ഗുണദോഷ സമ്മിശ്രമായ വാരമാണ്. കുടുംബത്തിൽ സന്തോഷം വിളയാടും. സ്ത്രീകളുമായി അടുത്ത് ഇടപെടുവാൻ അവസരം ഉണ്ടാകും. ചെയുന്ന പ്രവർത്തികൾ ലാഭത്തിൽ കലാശിക്കും. എവിടെയും മാന്യത ലഭിക്കും. മനസുഖം ഉണ്ടാകും. എന്നാൽ വാരാന്ത്യം കോടതിയിൽ നിന്നും പ്രതികൂല അനുഭവം ഉണ്ടായേക്കാം.
ചിങ്ങം രാശി: (മകം, പൂരം, ഉത്രം ആദ്യ 1/4 ഭാഗം)
സഞ്ചാരം വർദ്ധിക്കും. വാഹനം കൈകാര്യം ചെയ്യുമ്പോൾ ജാഗ്രത പാലിക്കുക. ഉദരരോഗം, ഗ്യാസ് ട്രബിൾ ഒക്കെയും ഉണ്ടാകും. കീർത്തി, കുടുംബത്തിൽ മനസുഖം, ധനനേട്ടം, തൊഴിലിൽ ഉയര്ന്ന പദവി, പ്രശസ്തി ഒക്കെയും പ്രതീക്ഷിക്കാം.
കന്നി രാശി: (ഉത്രം അവസാന 3/4 ഭാഗം, അത്തം, ചിത്തിര ആദ്യ 1/2 ഭാഗം)
മാതാവിന് മോശം അനുഭവങ്ങൾ ഉണ്ടാകും. തൊഴിൽ സംബന്ധമായ അലട്ടലുകൾ കുറയും. നറുക്കെടുപ്പ്, ചിട്ടി ഒക്കെയിലും ഭാഗ്യം കടാക്ഷിക്കും. കുടുംബന്ധുക്കളിൽ നിന്നും ഗുണാനുഭവങ്ങൾ ഉണ്ടാകും. വാഹനഭാഗ്യം ഉണ്ടാകും.
തുലാം രാശി: (ചിത്തിര അവസാന 1/2 ഭാഗം, ചോതി, വിശാഖും ആദ്യ 3/4 ഭാഗം)
സ്ത്രീകളുമായി അടുത്ത് ഇടപെടുവാൻ അവസരം, കൃഷി പക്ഷി മൃഗാദികളുടെ ബിസിനസ്സ് ചെയ്യുന്നവർക്ക് വൻ നേട്ടം ഉണ്ടാകും. ശരീരചൈതന്യം വർദ്ധിക്കും. ഈശ്വരാധീനം ഉണ്ടാകും. ചിലർക്ക് വിദേശവാസം അനുഭവത്തിൽ വരും. അഭിമാനത്തിന് ഹാനികരമായ സംഭവങ്ങൾ ഉണ്ടായേക്കാം.
വൃശ്ചികം രാശി: (വിശാഖം അവസാന 1/4 ഭാഗം, അനിഴം, തൃക്കേട്ട)
തൊഴിൽക്ലേശങ്ങൾ ഉണ്ടാകും. മാനസികമായും ശാരീരികമായും ബുദ്ധിമുട്ടും. ഭാര്യാ – ഭർതൃ – സന്താന ദുഃഖം, എല്ലാക്കാര്യങ്ങളിലും തടസ്സം . ജലഭയം കാണുന്നതിനാൽ അപ്രകാരം ഇടപെടുന്നവർ സൂക്ഷിക്കുക. ഉദര രോഗങ്ങൾ ഉണ്ടായേക്കാം. ഭക്ഷ്യ വിഷബാധ ഉണ്ടാകാൻ സാധ്യത.
ധനു രാശി: (മൂലം, പൂരാടം, ഉത്രാടം ആദ്യ 1/4 ഭാഗം)
രോഗതിദുരിതഹാനി ഉണ്ടാകും. സൽസുഹൃത്തുക്കളെ കണ്ടുമുട്ടാനും അവരോടു സമയം ചിലവഴിക്കാനും അവസരം ഉണ്ടാകും. തൊഴിൽ ക്ലേശങ്ങൾ വർദ്ധിക്കും. അപമാനിതനാകാൻ സാധ്യത. ശത്രു വിജയം, ഈശ്വര വിശ്വാസം വർദ്ധിക്കുകയും ചെയ്യും.
മകരം രാശി: (ഉത്രാടം അവസാന 3/4 ഭാഗം, തിരുവോണം, ആദ്യ അവിട്ടം 1/2 ഭാഗം)
സ്ത്രീകളുമായുള്ള അനാവശ്യ ബന്ധങ്ങൾ ധനനഷ്ടം മാനഹാനി ഒക്കെ ഉണ്ടാകും. കലാസാഹിത്യ മേഖലയിൽ ഉള്ളവർക്ക് അംഗീകാരം തേടി വരും. വിനോദയാത്രക്ക് അവസരം. ആടയാഭരണലബ്ധി, ഭക്ഷണസുഖം ഒക്കെയും പ്രതീക്ഷിക്കാം.
കുംഭം രാശി: (അവിട്ടം അവസാന 1/2 ഭാഗം, ചതയം, പൂരൂരുട്ടാതി ആദ്യ 3/4 ഭാഗം)
വളരെക്കാലമായി കാണാതെയിരുന്ന ബന്ധുക്കളെ കണ്ടുമുട്ടുകയും അവരോടൊപ്പം സമയം ചിലവഴിക്കുകയും ചെയ്യും. വളരെക്കാലമായി ഉള്ള പ്രണയം വിവാഹത്തിൽ കലാശിക്കും. ദീർഘകാലമായി ബുദ്ധിമുട്ടിച്ചിരുന്ന രോഗങ്ങൾക്ക് ശമനം ഉണ്ടാകും.
മീനം രാശി: (പൂരൂരുട്ടാതി അവസാന 1/4 ഭാഗം, ഉതൃട്ടാതി, രേവതി)
സർക്കാർ തൊഴിൽ തേടുന്നവർക്ക് അനുകൂലസമയം ആണ്. കുടുംബത്തിൽ ആഹ്ളാദന്തരീക്ഷം സംജാതമാകും. ദമ്പതികളിൽ ഐക്യം, സാമ്പത്തിക ഉന്നതി, മനസ്സിൽ വിചാരിക്കുന്നത് നടക്കുന്നകാലം ആണ്. ശയനസുഖം, മനഃസുഖം, ഒക്കെ യോഗം.
ജയറാണി ഈ വി .
WhatsApp No : 9746812212
(പാരമ്പര്യ ജ്യോതിഷ കുടുംബത്തിലെ അംഗം . ഇരുപതിലേറെ വർഷമായി ജ്യോതിഷം സംഖ്യാശാസ്ത്രം വാസ്തു ആചാര അനുഷ്ഠാന വിഷയങ്ങൾ കൈകാര്യം ചെയ്യുന്നു)
Weekly Prediction by Jayarani E.V / 2023 August 27 to September 02
