ഏഥൻസ്: ഏഥൻസിൽ ഇന്ത്യയിലെയും ഗ്രീസിലെയും ബിസിനസ് പ്രതിനിധികളെ അഭിസംബോധന ചെയ്ത് പ്രധാനമന്ത്രി നരേന്ദ്രമോദി. ഇരു രാജ്യങ്ങളും തമ്മിലുള്ള ബന്ധം പരമാവധി പ്രയോജനപ്പെടുത്തണമെന്ന് ബിസിനസ് പ്രതിനിധികളോട് പ്രധാനമന്ത്രി നിർദ്ദേശിച്ചു.
‘വിദേശ നിക്ഷേപത്തിനായി ഇന്ത്യയുടെ വാതിലുകൾ തുറന്നിരിക്കുകയാണ്. ഇരു രാജ്യങ്ങളുടെയും കൂട്ടായ പ്രവർത്തനങ്ങൾ വലിയ സാധ്യതകളും പ്രതീക്ഷകളുമാണ് നൽകുന്നത്. ഡിജിറ്റൈസേഷനൊപ്പം രാജ്യത്തെ ബിസിനസുകളും വർദ്ധിച്ചുകൊണ്ടിരിക്കുകയാണ്. പരിഷ്ക്കരിപ്പിക്കുക, നടപ്പിലാക്കുക, പരിവർത്തനം ചെയ്യുക എന്നീ ആശയങ്ങളിലൂടെയാണ് ഇന്ത്യയുടെ സമ്പദ്വ്യവസ്ഥ ശക്തമായത്. ഇനിയും ഇന്ത്യ മുന്നോട്ട് പോകുക തന്നെ ചെയ്യുമെന്നും പ്രധാനമന്ത്രി പറഞ്ഞു.
ഗ്രീസ് പ്രധാനമന്ത്രി കിരിയാകോസ് മിത്സോടാക്കിസ് ആതിഥേയത്വം വഹിച്ച ബിസിനസ് ലോഞ്ച് ചടങ്ങിൽ ഇന്ത്യയിൽ നിന്നും ഗ്രീസിൽ നിന്നുമുള്ള നിരവധി കമ്പനികളിലെ പ്രതിനിധികളാണ് പങ്കെടുത്തത്. ദേശീയ സുരക്ഷാ ഉപദേഷ്ടാവ് അജിത് ഡോവൽ, വിദേശകാര്യ മന്ത്രി എസ് ജയശങ്കർ എന്നിവരും ചടങ്ങിൽ പങ്കെടുത്തു. ജോഹന്നാസ്ബർഗിൽ നടന്ന 15-ാമത് ബ്രിക്സ് ഉച്ചകോടിയിൽ പങ്കെടുത്ത ശേഷം ഒരു ദിവസത്തെ സന്ദർശനത്തിനായാണ് പ്രധാനമന്ത്രി ഗ്രീസിലെത്തിയത്.
Comments