ഹൈദ്രാബാദ്: രാഹുലും സോണിയയും പറഞ്ഞതെല്ലാം പ്രാവർത്തികമാക്കിയിട്ടുണ്ടെന്ന് കോൺഗ്രസ് ദേശീയ അദ്ധ്യക്ഷൻ മല്ലികാർജ്ജുൻ ഖാർഗെ. തെലങ്കാനയിൽ നടന്ന തിരഞ്ഞെടുപ്പ് റാലിയിൽ പ്രവർത്തകരെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. ജനങ്ങൾക്ക് വേണ്ടി കോൺഗ്രസിന് പ്രവർത്തിക്കണം. 53 വർഷം ഭരിച്ചിട്ടും കോൺഗ്രസ് ഒന്നും ചെയ്തില്ലെന്നാണ് ബിജെപി പറയുന്നതെന്നും കോൺഗ്രസിനോട് അവർ റിപ്പോർട്ട് കാർഡ് ചോദിക്കുകയാണെന്നും അദ്ദേഹം പറഞ്ഞു.
കോൺഗ്രസ് അടങ്ങുന്ന 26 പാർട്ടികൾ ചേർന്ന് നരേന്ദ്രമോദി നയിക്കുന്ന ബിജെപിയെ കേന്ദ്രത്തിൽ നിന്ന് പുറത്താക്കാൻ പോകുവാണെന്നും തെലങ്കാനയിലെ ബിആർഎസ് പ്രതിപക്ഷത്തോടൊപ്പം ചേർന്നില്ലെന്നും ബിജെപിയ്ക്കൊപ്പമാണ് അവർ ചേർന്നതെന്നും അദ്ദേഹം കൂട്ടിച്ചേർത്തു.
അതേസമയം, ഒരു പ്രധാനമന്ത്രി സ്ഥാനാർത്ഥിയെ ഉയർത്തിക്കാട്ടൻ പ്രതിപക്ഷ സഖ്യത്തിന് സാധിച്ചിട്ടില്ല. നിലവിൽ പ്രതിപക്ഷ ഐക്യം രണ്ട് യോഗങ്ങൾ കൂടിയെങ്കിലും രണ്ടിലും ഒരു പൊതു സ്ഥാനാർത്ഥിയെ മുന്നോട്ട് വെയ്ക്കാൻ സാധിച്ചിരുന്നില്ല. ഇതിനകം പ്രതിപക്ഷ ഐക്യത്തിൽ വിള്ളലുകൾ വീണു. ടിഎംസി ഇതിനോടകം ബംഗാൾ മുഖ്യമന്ത്രി മമതാ ബാനാർജിയെ പ്രധാനമന്ത്രിയാക്കണം എന്ന് ആവശ്യപ്പെട്ട് കഴിഞ്ഞു. ബിഹാർ മുഖ്യമന്ത്രി നിതീഷ് കുമാറിന് വേണ്ടിയും വാദങ്ങൾ ഉയർന്ന് കഴിഞ്ഞു.
